Dabaal-degyada sannad-guurada 66-aad ee Maalinta Xorriyadda Soomaaliya ayaa helay hambalyooyin tiro badan oo ka yimid dowlado, ururro caalami ah, iyo mas’uuliyiin sare oo dunida ah, taas oo ka tarjumaysa taageerada iyo niyad-wanaagga ballaaran ee loo hayo shacabka Soomaaliyeed munaasabaddan qaran ee muhiimka ah.

Farriimo hambalyo ah ayaa waxaa soo diray Mareykanka, Boqortooyada Ingiriiska (UK), Finland, Serbia, Shiinaha, Turkiga, Azerbaijan, Hindiya, Qatar, Sacuudiga, Kuwait, Masar, Kenya, Kanada, Midowga Afrika (AU), IGAD, iyo dalal kale oo saaxiib la ah Soomaaliya iyo bahwadaagta caalamiga ah. Hambalyadan ayaa lagu baahiyay baraha rasmiga ah ee Wasaaradaha Arrimaha Dibadda, safaaradaha, iyo mas’uuliyiinta sare ee dowladahaas.

Farriimahooda, bahwadaagta caalamiga ah waxay hambalyo iyo bogaadin u direen Dowladda iyo shacabka Jamhuuriyadda Federaalka Soomaaliya munaasabadda Maalinta Xorriyadda, iyagoo sidoo kale dib u xaqiijiyay sida ay uga go’an tahay xoojinta xiriirka laba geesoodka ah iyo iskaashiga dhinacyada nabadda, amniga, horumarinta, ganacsiga, iyo xasilloonida gobolka.

Maalinta Xorriyadda ee sannadkan ayaa si weyn loogu tilmaamay mid ka mid ah dabaal-degyadii ugu ballaarnaa uguna firfircoonaa ee la qabto sannadihii u dambeeyay. Munaasabado kala duwan ayaa lagu qabtay guud ahaan Soomaaliya, halkaas oo kumannaan muwaadiniin ahi ay ka qaybgaleen xafladaha calan-saarka, bandhigyada dhaqanka, riwaayadaha, bandhigyada fanka, iyo isu-soo-baxyada dadweynaha.

Sidoo kale, jaaliyadaha Soomaaliyeed ee ku nool daafaha dunida ayaa si weyn u xusay munaasabaddan iyagoo qabtay munaasabado dhaqameed iyo kulammo bulsho, taas oo muujisay ruuxa midnimada, waddaniyadda, iyo jacaylka ay Soomaalidu u hayaan dalkooda meel kasta oo ay joogaan.

Aqoonsiga iyo hambalyada ballaaran ee caalamku u muujiyay Maalinta Xorriyadda Soomaaliya ayaa sidoo kale iftiimisay kororka doorka diblomaasiyadeed ee dalka iyo xiriirrada adag ee Soomaaliya ay la yeelanayso dowladaha iyo ururrada caalamiga ah.