Ciidamada Wadajirka ah ee Dhaqdhaqaaqyada Hubeysan ee Suudaan ayaa Axaddii sheegay inay burburiyeen 49 gaari oo dagaal oo ay leeyihiin Ciidamada Gurmadka Degdegga ah (RSF), isla markaana ay qabteen 70 dagaalyahan, iyagoo kaashanaya Ciidamada Qalabka Sida ee Suudaan.
Afhayeenka Ciidamada Wadajirka ah Mutawakil Ali Wakeel ayaa bayaan uu soo saaray ku sheegay in ciidamadiisa, oo la shaqeynaya Ciidamada Qalabka Sida ee Suudaan iyo Ciidamada Iska-caabbinta Shacabka ee jiidda saxaraha, ay burburiyeen kolonyo guurguuraysa oo ka tirsan RSF.
Wuxuu sheegay in dagaalladu ay RSF gaarsiiyeen khasaare culus oo isugu jira dhimasho iyo burburin qalab dagaal.
Jiidda saxaraha ayaa ka kooban deegaanno ku yaalla waqooyiga iyo galbeedka Suudaan, kuwaas oo gaara xuduudaha Chad iyo Libya.
“Hawlgalku wuxuu sababay burburinta 49 gaari oo dagaal iyo in gacanta lagu dhigo 30 gaari oo xaalad wanaagsan ku jira, iyo sidoo kale booyad shidaal,” ayuu yiri Wakeel, isagoo intaas ku daray in qiimeynta natiijada hawlgalku ay weli socoto.
Wuxuu sheegay in ciidamada ay sidoo kale qabteen 70 dagaalyahan oo RSF ah, gacantana ku dhigeen tiro badan oo batariyo ah oo loo adeegsado hawlgelinta diyaaradaha aan duuliyaha lahayn, isla markaana ay kooxda gaarsiiyeen khasaare kale oo isugu jira dagaalyahanno iyo qalab.
Afar xubnood oo ka tirsan Ciidamada Wadajirka ah ayaa lagu dilay dagaallada, ayuu intaas ku daray.
RSF ayaan weli wax war ah ka soo saarin sheegashadaas.
Marka laga soo tago gobolka Blue Nile ee koonfur-bari Suudaan iyo gobolka Darfur ee galbeedka dalka, saddexda gobol ee Kordofan, Waqooyiga, Galbeedka iyo Koonfurta Kordofan, ayaa tan iyo 25-tii Oktoobar waxaa ka socday dagaallo u dhexeeya Ciidanka Suudaan iyo RSF.
Suudaan waxaa tan iyo bishii Abriil 2023 ka socday dagaal u dhexeeya Ciidanka Suudaan iyo RSF, kaas oo dilay tobannaan kun oo qof, halka ku dhowaad 13 milyan oo qof ay ku barakaceen, sida ay muujinayaan qiyaasaha Qaramada Midoobay iyo hay’adaha caalamiga ah.
