Turkiga oo si kulul u cambaareeyay weerar argagixiso oo ka dhacay Pakistan

Dowladda Turkiga ayaa si adag u cambaareysay weerar argagixiso oo "foosha xun" oo Jimcihii ka dhacay gobolka Khyber Pakhtunkhwa ee dalka Pakistan, kaas oo lagu dilay ugu yaraan 13 askari, halka tiro kalena oo ay ku jiraan dad rayid ah, lagu dhaawacay.

"Waxaan si aad ah uga xunnahay khasaaraha nafeed iyo dhaawacyada ka dhashay weerarkii argagixisanimo ee dhacay 28-kii Juun," ayaa lagu yiri bayaan kasoo baxay wasaaradda arrimaha dibadda ee Turkiga oo la faafiyay Sabtidii.

"Waxaan si xooggan u cambaareyneynaa weerarkan foosha xun, waxaana Alle uga baryeynaa inuu u naxariisto kuwa ku dhintay, halka kuwa dhaawacmayna aan u rajeyneyno caafimaad degdeg ah," ayaa lagu daray bayaankaas.

Weerarkaasi oo uu fuliyay qof isa soo miidaamiyay, ayaa lagu bartilmaameedsaday kolonyo ciidan oo maraysay Suuqa Khadii ee magaalada Mir Ali, sida ay xaqiijiyeen ilo amni oo lagu kalsoon yahay oo ay soo xigatay warbaahinta maxalliga ah.

Sida laga soo xigtay saraakiisha ammaanka, qofka is qarxiyay ayaa watay gaari walxaha qarxa laga buuxiyay, waxaana uu weerarka ku beegsaday cutub ka tirsan guutada 22-aad ee Ciidanka Xoogga Dalka Pakistan.

Waxaa la rumeysan yahay in weerarkan uu si gaar ah u qorsheysnaa.

Mas’uuliyadda weerarka ayaa waxaa sheegtay kooxda Tehrik-i-Taliban Pakistan (TTP), oo ah garab maxalli ah oo ka mid ah kooxaha argagixisada, balse aan xiriir toos ah la lahayn Taalibaan-ka Afghanistan, inkasta oo magac ahaan ay is shabahan.

TTP iyo Taalibaan Afghanistan waa laba kooxood oo kala mabda’ ah, waxayna leeyihiin hoggaan kala duwan iyo ajandooyin is diiddan.

Weerarkii Jimcaha ayaa lagu tilmaamay mid ka mid ah weerarradii ugu dhimashada badnaa ee muddo hal maalin gudaheed ah lagu beegsado ciidamada ammaanka ee Pakistan, gaar ahaan gobolka ay colaadaha badani ka jiraan ee Khyber Pakhtunkhwa.

Dowladda Pakistan ayaa tan iyo weerarkaasi kordhisay howlgallada sirdoonka ku saleysan ee ay ka waddo gobolkaas, iyada oo lagu beegsanayo xubnaha kooxda TTP.

"Waxaan sii wadi doonaa inaan si buuxda u garab istaagno Pakistan dagaalka ay kula jirto argagixisada," ayaa lagu soo xiray bayaanka wasaaradda arrimaha dibadda ee Turkiga.