Muqdisho oo martigelisay shir cilmiyeed qaran oo ku saabsan sugnaanta cunada iyo hal-abuurka beeraha
Khubaradu waxay isku raaceen in beeraleydan ay u baahan yihiin taageero nidaamsan oo ay ka mid yihiin helitaanka aqoon casri ah oo dhinaca beeraha ah, adeegyo aasaasi ah iyo siyaasad dowladeed oo dhiirrigelin leh.
Shir cilmiyeed qaran oo heer sare ah ayaa Arbacadii ka qabsoomay magaalada Muqdisho, kaas oo diiradda lagu saaray caqabadaha la xiriira sugnaanta cunada, horumarinta abuurka dalagyada, iyo la qabsiga isbeddelka cimilada.
Shirkan oo ay soo qabanqaabisay Jaamacadda Zamzam ee Sayniska iyo Teknolojiyadda ayaa isu keenay khubaro dhinaca beeraha ah, mas’uuliyiin dowladeed, cilmi-baarayaal jaamacadeed iyo wakiillo ka socda ganacsiga gaarka loo leeyahay, si loo falanqeeyo xalal waara oo lagu horumarinayo wax-soo-saarka beeraha dalka.
Qodobka udub-dhexaadka u ahaa doodaha ayaa ahaa muhiimadda istiraatiijiyadeed ee horumarinta noocyo dalagyo adkaysi leh, gaar ahaan digirta iyo dalagyada kale ee nafaqo badan leh.
Ka-qaybgalayaashu waxay muujiyeen in hagaajinta hidde-sidaha dalagyadani ay tahay tiir muhiim u ah kordhinta wax-soo-saarka beeraha qaranka. Waxa ay sidoo kale adkeeyeen in dhismaha nidaam abuur tayo leh oo lagu kalsoonaan karo uu yahay shardi lagama maarmaan u ah xaqiijinta wax-soo-saar joogto ah iyo xasillooni dhaqaale oo ay ku tiirsan yihiin bulshooyinka miyiga ah.
Ergada ayaa falanqeeyay doorka muhiimka ah ee beeraleyda yar-yar ku leeyihiin ilaalinta silsiladda sahayda cuntada ee dalka. Khubaradu waxay isku raaceen in beeraleydan ay u baahan yihiin taageero nidaamsan oo ay ka mid yihiin helitaanka aqoon casri ah oo dhinaca beeraha ah, adeegyo aasaasi ah iyo siyaasad dowladeed oo dhiirrigelin leh.
Shirku wuxuu sidoo kale muujiyay baahida degdegga ah ee loo qabo in la mideeyo siyaasadda, cilmi-baarista sayniska iyo teknoolajiyadda beeraha si loo yareeyo saameynta xun ee isbeddelka cimiladu ku leeyahay nidaamka cuntada gudaha.
Jaamacadda Zamzam ee Sayniska iyo Teknolojiyadda ayaa mar kale xaqiijisay doorkeeda hoggaamineed ee isku xirka cilmi-baarista jaamacadeed iyo himilooyinka horumarineed ee qaranka.
Jaamacaddu waxay xustay in shirkan uu qayb ka yahay dadaal ballaaran oo lagu dhiirrigelinayo xalal wax ku ool ah oo ku dhisan saynis, kuwaas oo si toos ah uga qayb qaadanaya yaraynta saboolnimada iyo horumarinta nolol-maalmeedka bulshada Soomaaliyeed.