Mareykanka iyo Midowga Afrika (AU) ayaa maalintii Arbacada ku heshiiyay inay sameeyaan guddi farsamo oo ka shaqayn doona mashaariicda waaweyn iyo maalgashiga, si loo kordhiyo maalgashiga shirkadaha gaarka loo leeyahay iyo xoojinta xiriirka dhaqaale ee Mareykanka iyo Afrika.

Qoraal wadajir ah oo ka soo baxay Waaxda Arrimaha Dibadda ee Mareykanka ayaa lagu sheegay in guddigan uu ujeedkiisu yahay xoojinta iskaashiga dhaqaale, abuurista fursado shaqo, iyo horumarinta amniga dhaqaalaha ee Mareykanka iyo guud ahaan qaaradda Afrika.

Waxa kale oo qoraalka lagu xusay in guddigani uu saldhig u noqon doono iskaashi dhaqaale oo fog, kaas oo wax weyn ka beddeli doona xiriirka labada dhinac sanadaha soo socda, iyadoo la raadinayo koboc dhaqaale oo waara.

Heshiiskan ayaa yimid ka dib markii Kuxigeenka Xoghayaha Arrimaha Dibadda Mareykanka, Christopher Landau, iyo Guddoomiyaha Guddiga Midowga Afrika, Maxamuud Cali Yuusuf, ay ku kulmeen magaalada Addis Ababa ee caasimadda dalka Itoobiya. Labada mas'uul ayaa hoosta ka xariiqay in dhisidda kaabayaasha dhaqaalaha iyo ganacsiga ay fure u yihiin Afrika nabad ah oo barwaaqo ah.

Guddigan ayaa u adeegi doona sidii madal ay khubarada Mareykanka iyo kuwa Midowga Afrika isugu yimaadaan si ay u aqoonsadaan fursadaha ay shirkadaha gaarka loo leeyahay ee Mareykanka ku maalgashan karaan mashaariicda ay taageerto Midowga Afrika. Maalgashigan ayaa lagu horumarin doonaa marinnada gaadiidka, isgaarsiinta, shabakadaha tamarta, iyo isku xirka qawaaniinta ganacsiga ee qaaradda.

Christopher Landau ayaa hadda ku jira socdaal uu ku marayo dalalka Afrika ee kala ah Masar, Itoobiya, Kenya, iyo Jabuuti, isagoo uu weheliyo Taliyaha Taliska Mareykanka ee Afrika (AFRICOM), Jeneraal Dagvin Anderson. Socdaalkooda ayaa bilaawday 24-kii Janaayo, wuxuuna ku eg yahay 1-da Febraayo, 2026.