Guddiga Sanduuqa Qaranka ee Maareynta Khataraha Musiibooyinka ayaa kulan ku yeeshay xarunta Hay’adda Maareynta Musiibooyinka Qaranka (SoDMA) ee Muqdisho, iyadoo kulanka ay isugu yimaadeen mas’uuliyiin sare oo dowladda ah iyo wakiillo ka kala socday qaybaha kala duwan si looga wada hadlo u diyaar-garowga Super El Niño iyo khataraha fatahaadaha.
Kulanka waxaa guddoomiyay Wasiirka Arrimaha Gudaha, Federaalka iyo Dib-u-heshiisiinta, Cali Yuusuf Cali (Xoosh), waxaana ka qaybgalay xubno ka tirsan Golaha Wasiirrada Federaalka, Guddoomiyaha SoDMA Maxamuud Macallin, wakiillo ka socday Maamulka Gobolka Banaadir, culimo, bulshada rayidka ah iyo ganacsatada. Wadahadallada ayaa diiradda lagu saaray u diyaar-garowga Dowladda ee Super El Niño, nadiifinta marinnada biyaha, xoojinta Sanduuqa Qaranka ee Maareynta Khataraha Musiibooyinka iyo qaadista tallaabooyin lagu yareynayo khataraha fatahaadaha.
Wasiirka Gaashaandhigga, Axmed Macallin Fiqi, ayaa ku baaqay diyaar-garow isku-duwan iyo tallaabooyin hore oo ku saleysan saadaasha El Niño, isagoo adkeeyay baahida loo qabo diyaar-garow buuxa oo ka jira Banaadir si loo ilaaliyo dadkeeda tirada badan ee nugul. Wasiirka Deegaanka iyo Isbeddelka Cimilada, Sarreeye Gaas Bashiir Maxamed Jaamac, ayaa adkeeyay muhiimadda nadiifinta marinnada biyaha iyo meelaha muhiimka ah ee biyo-mareennada, xoojinta nidaamyada digniinta hore iyo kor u qaadista wacyigelinta bulshada si loo yareeyo khataraha la xiriira Super El Niño iyo fatahaadaha.
Wasiirka Qorsheynta, Beenebeene, ayaa adkeeyay diiradda Dawladda ee yareynta khataraha musiibooyinka, wuxuuna ku baaqay dadaal mideysan oo ay sameeyaan hay’adaha dawladda, hay’adaha bani’aadannimada iyo ganacsatada.
Guddoomiye Ku-xigeenka Gobolka Banaadir ee Amniga iyo Arrimaha Siyaasadda, Maxamed Axmed Diiriye (Yabooh), ayaa soo bandhigay qorshayaasha biyaha looga saarayo goobaha fatahaaduhu saameeyeen, loogu diyaar-garoobayo roobabka El Niño, looguna sameynayo xalal waara khataraha fatahaadaha.
Kulanka ayaa hoosta ka xarriiqay muhiimadda diyaar-garow isku-duwan, tallaabooyin hore, xoojinta nidaamyada digniinta iyo dadaallo wadajir ah oo lagu yareynayo saameynta Super El Niño iyo fatahaadaha ee bulshada.
