Soomaaliya ayaa ka qaybgalaysa tababarka saddexaad ee Farsamada iyo Habraacyada Hubinta Aqoonsiga oo lagu qabanayo Nairobi, Kenya, 21–25 Sebteembar 2026, kaas oo ay isugu yimaadeen mas’uuliyiin ka socda hay’adaha muhiimka ah ee Soomaaliya ee aqoonsiga, socdaalka iyo baarista dambiyada iyo dhiggooda Kenya.
Tababarka waxaa ka qaybgalaya mas’uuliyiin ka socda Hay’adda Aqoonsiga iyo Diiwaangelinta Qaranka (NIRA), Hay’adda Socdaalka iyo Jinsiyadda (ICA) iyo Waaxda Baarista Dambiyada (CID), iyo hay’adaha ay khuseyso ee Kenya. Munaasabadda furitaanka waxaa ka qaybgalay Agaasimaha Guud ee NIRA, Cabdiweli Cali Cabdulle (Timacadde), Agaasimaha Guud ee ICA, Xuseen Qaasim Yuusuf, Agaasimaha CID Sarreeye Guuto Ibraahim Aadan Dhaayow, Agaasimaha Guud ee Adeegyada Socdaalka Kenya Evelyn Cheluget iyo Safiirka Norway Siv Cathrine Moe.
Agaasimaha Guud ee NIRA, Cabdiweli Cali Cabdulle, ayaa hadalkiisa ku adkeeyay muhiimadda ay leedahay xoojinta khibradda baarista dukumentiyada, xaqiijinta aqoonsiga iyo isbarbardhigga wejiyada. Wuxuu xusay in khibradaha farsamo ee noocan ahi ay gacan ka geystaan xoojinta nidaamyada aqoonsiga ee lagu kalsoonaan karo, sugidda xuduudaha iyo taageeridda baaritaannada dambiyada, iyagoo sidoo kale hagaajinaya helitaanka adeegyada dadweynaha.
Ka qaybgalka NIRA, ICA iyo CID ee tababarkan wadajirka ah markii saddexaad ayaa muujinaya sii socoshada iskaashiga hay’adaha iyo iskaashiga Soomaaliya ay la leedahay Norwegian Partnership for Migration (PfM) ee horumarinta awoodda farsamo ee maareynta aqoonsiga iyo dhinacyada la xiriira.
