Wasiirka Gaashaandhigga Jamhuuriyadda Federaalka Soomaaliya, Mudane Axmed Macallin Fiqi, ayaa Khamiistii ka qeyb galay xaflad qalin-jabin heer sare ah oo loo qabtay saraakiil ciidan, taas oo ka dhacday Kulliyadda Milatariga ee Ahmed bin Mohamed, kuna taalla magaalada Doha.
Wasiirka oo ku guda jira booqasho shaqo oo rasmi ah oo uu ku joogo dalka Khaliijka, ayaa goob joog u ahaa qalin-jabinta dufcaddii ugu dambeysay ee saraakiil ah, kuwaas oo ay ka mid ahaayeen xubno ka tirsan Ciidanka Qalabka Sida ee Soomaaliyeed, kuwaas oo dhammaystiray tababaro adag oo aqoon iyo kuwo hawlgalba ah.
Xafladda weyn ayaa waxaa guddoominayay Amiirka Dowladda Qatar, Amiir Sheekh Tamiim bin Hamad Al Thani, oo goobta ku sharfay joogitaankiisa si rasmi ahna u soo xiray sannad-dugsiyeedka. Amiirka ayaa si shaqsi ah u guddoonsiiyay bilado iyo abaalmarinno saraakiishii ugu waxqabadka fiicnaa, isagoo aqoonsaday heerka sare ee ay ka gaareen cilmiga milatariga iyo hoggaaminta.
Qalin-jabintani waxay astaan u tahay horumar kale oo laga gaaray iskaashiga difaaca ee u dhexeeya Muqdisho iyo Doha, taasoo muujinaysa ka go’naansho wadajir ah oo ku aaddan amniga gobolka iyo dhismaha heerar xirfadeed oo ciidan.
Intii at socotay munaasabaddu, Wasiir Fiqi ayaa muujiyay mahadnaq ballaaran oo ku aaddan taageerada joogtada ah iyo tan deeqsinimada leh ee Dowladda Qatar ay ka geysaneyso horumarinta iyo casriyeynta Ciidanka Xoogga Dalka Soomaaliyeed. Wuxuu sheegay in xirfadaha horumarsan, aqoonta istaraatiijiyadeed iyo anshaxa ay heleen saraakiisha qalin-jabisay ay si weyn u kordhin doonaan awoodda hawlgal iyo diyaargarowga dagaal ee ciidamada Soomaaliyeed marka ay dib ugu laabtaan dalka.
Wasiirka ayaa carrabka ku adkeeyay in tababarro heer sare ah oo noocan oo kale ah ay lama huraan u yihiin dhismaha hay’ad difaac qaran oo xooggan, is-ku-filnaansho leh, isla markaana awood u leh ilaalinta madaxbannaanida dalka.
Waxaa Wasiirka ku wehliyay xafladda Taliyaha Ciidanka Xoogga Dalka Soomaaliyeed, Sareeye Gaas Odowaa Yuusuf Raage. Joogitaankooda wadajirka ah ayaana muujinaya muhiimadda istaraatiijiyadeed ee ay Dowladda Federaalka siineyso iskaashiga difaaca iyo kor u qaadista xirfadda hoggaanka ciidanka. Ka qeybgalka Doha ayaa xoojinaya xiriirka walaaltinimo ee xooggan ee u dhexeeya Soomaaliya iyo Qatar, gaar ahaan dhinaca dib-u-habaynta waaxda amniga.
