Madaxweynaha Maraykanka Donald Trump ayaa Khamiistii sheegay in weerarro kale ay xigi doonaan kadib markii la weeraray buundada ugu weyn Iiraan, isagoo Tehran ugu baaqay inay oggolaato heshiis inta goori goor tahay.

“Buundadii ugu weynayd ee Iiraan ayaa dumaysa, mar dambena lama adeegsan doono. Wax badan oo kale ayaa xigi doona!” ayuu Trump ku qoray bartiisa Truth Social.

“Waa waqtigii Iiraan ay heshiis gaari lahayd inta goori goor tahay, oo aan waxba ka harin waxa weli noqon karay dal weyn,” ayuu raaciyay. Trump ayaa marar badan ku booriyay Iiraan inay wadaxaajood gasho, isagoo dhowaan sheegay in hoggaanka cusub ee Tehran ay codsadeen xabbad-joojin, balse mas’uuliyiinta Iiraan ayaa arrintaas diiday.

Isagoo la hadlayay Wargeyska Time, Trump ayaa sheegay in Iiraan ay doonayso heshiis, isagoo burburka ka jira dalkaas ku tilmaamay sababta.

Wuxuu sidoo kale sheegay in hadallada Iiraan ee sheegaya inaysan wadaxaajood la lahayn Tehran aysan sax ahayn, isagoo ku tilmaamay “wadaxaajood fudud nooc ahaan.”

Warbaahinta maxalliga ah ayaa sheegtay in weerar ay fuliyeen Maraykanka iyo Israa’iil lagu beegsaday buundo muhiim ah oo ku taalla waqooyiga Iiraan. Wakaaladda Fars ayaa sheegtay in dhowr goobood lagu beegsaday deegaanka Azimieh ee u dhow Karaj, oo ay ku jirto Buundada B1 oo lagu tilmaamay tan ugu dheer Bariga Dhexe.

Warbixinno ayaa sidoo kale tilmaamaya in la adeegsaday weerar loo yaqaan “double tap,” oo ah in isla goobta laba jeer oo xiriir ah la beegsado.

Sida wararka lagu sheegay, weerarka labaad ayaa dhacay qiyaastii hal saac kadib kii hore, xilli ay goobta joogeen gurmadka degdegga ah ee caawinayay dadka dhaawacmay, inkastoo shaqaalahaas loo tixgeliyo rayid la ilaaliyo sida uu dhigayo sharciga caalamiga ah.

Weerarkan ayaa qayb ka ah olole militari oo bilowday 28-kii Febraayo, markaas oo Maraykanka iyo Israa’iil ay bilaabeen duqeymo ka dhan ah Iiraan, kuwaas oo lagu dilay in ka badan 1,340 qof, oo ay ku jiraan hoggaamiyihii sare ee xilligaas Cali Khamenei.

Iiraan ayaa kaga jawaabtay weerarro diyaarado aan duuliye lahayn iyo gantaallo ah oo lagu qaaday Israa’iil, Urdun, Ciraaq iyo dalalka Khaliijka, taasoo keentay khasaare naf iyo burbur kaabayaal, isla markaana saameysay suuqyada caalamiga ah iyo duulimaadyada.