Madasha “Xiriirka Turkiga iyo Soomaaliya ee Geeddi-socodka Isbeddelka Caalamiga ah” ayaa lagu qabtay Ankara, iyadoo martigelisay madax sare oo iskugu jira wasiirro, aqoonyahanno iyo masuuliyiin kala duwan.
Masuuliyiinta ka soo qayb galay madasha ayaa waxaa ka mid ahaa Madaxa isgaarsiinta Turkiga, Burhanettin Duran, Wasiirka Warfaafinta, Dhaqanka iyo Dalxiiska ee Jamhuuriyadda Federaalka Soomaaliya Mudane Daa’uud Aweys Jaamac iyo Wasiirka Dekedaha iyo Gaadiidka Badda, Mudane Cabdulqaadir Maxamed Nuur.
Madaxa Isgaarsiinta ee Madaxtooyada Turkiga, Burhanettin Duran, oo ka hadlay furitaanka madasha ayaa sheegay in Turkigu uusan oggolaan doonin in xasuuqa Israa’iil ka waddo Falastiin iyo gardarradeeda gobolka loo soo raro Geeska Afrika.
Duran ayaa adkeeyay in aan marnaba la aqbali karin wax kasta oo lagu bartilmaameedsanayo madaxbannaanida, midnimada iyo wadajirka dhuleed ee Soomaaliya, isagoo xusay in Turkigu mar walba garab taagan yahay Soomaaliya. Wuxuu sidoo kale sheegay in Afrika ay noqotay xarun cusub oo soo jiidata dhaqaalaha caalamka, isla markaana Turkigu uu xiriirka Afrika ku dhisayo mabda’a sinnaanta, ixtiraamka iyo faa’iido wadaagga.
Wasiirka Dekedaha iyo Gaadiidka Badda Cabdulqaadir Maxamed Nuur iyo Wasiirka Warfaafinta Daa’uud Aweys Jaamac ayaa khudbado ka jeediyay bilowgii madasha.
Wasiir Cabdulqaadir ayaa tacsi u diray qoyska Duuliye Ibrahim Bolat oo ku shahiiday shilkii F-16, wuxuuna sheegay in inkastoo la xusayo 60 sano oo xiriir diblomaasiyadeed, haddana xiriirka labada dal uu ku saleysan yahay taariikh dheer oo walaaltinimo ah. Wuxuu xusay in Turkigu ka mid ahaa dowladihii ugu horreeyay ee aqoonsada Soomaaliya 1960-kii, isla markaana isbeddelka weyn uu billowday booqashadii Madaxweyne Erdoğan ee Muqdisho ee sannadkii 2011-kii.
Wasiir Daa’uud ayaa dhankiisa tilmaamay in Soomaaliya ay leedahay xeebta ugu dheer Afrika, isla markaana labada dal ay ka shaqeynayaan sidii loogu beddeli lahaa goob horseedda barwaaqo. Wuxuu xusay iskaashiga dhinacyada kaabeyaasha, tamarta iyo kheyraadka berriga iyo badda.
Wasiir Daa’uud ayaa sidoo kale adkeeyay muhiimadda mowqifka Turkiga ee ku aaddan ilaalinta midnimada dhuleed ee Soomaaliya, isagoo sheegay in iskaashiga istiraatiijiga ah ee labada dal uu sii xoojinayo nabadda, xasilloonida iyo horumarka Soomaaliya.
