Hay’adda Maareynta Musiibooyinka Qaranka ayaa bulshada ku nool guud ahaan Soomaaliya ugu baaqday inay u diyaar-garoobaan saameynta suurtagalka ah ee Super El Niño, oo ay ka mid yihiin roobab culus, daadad kedis ah, fatahaadaha webiyada iyo khataro kale oo la xiriira xaaladaha cimilada.
Bulshada ku nool deegaannada ay fatahaaduhu ka dhici karaan ayaa lagu boorriyey inay la socdaan wararka rasmiga ah ee cimilada iyo digniinaha hore, ayna sii ogaadaan goobaha nabdoon iyo waddooyinka daad-gureynta. Sidoo kale, waxaa lagula taliyey inay ilaashadaan dukumentiyada muhiimka ah iyo hantidooda, kana fogaadaan inay maraan waddooyinka ama meelaha ay biyuhu fatahaan.
Dadka deegaanka ayaa sidoo kale lagu dhiirrigeliyey inay nadiifiyaan marinnada biyaha iyo biyo-mareennada, meel dhow ku haystaan lambarrada gurmadka, isla markaana raacaan tilmaamaha maamullada deegaanka iyo adeegyada gurmadka.
U diyaar-garowgu wuxuu bilaabmaa ka hor inta aysan roobabku da’in. Tallaabooyinka hore ee la qaado waxay gacan ka geysan karaan badbaadinta nolosha, ilaalinta ilaha nololeed iyo yareynta khasaaraha.
