Madaxweynaha Turkiga Erdogan oo Riyadh kula kulmay Dhaxal-sugaha Sacuudiga Mohammed bin Salman
Booqashadan ayaa ah wejiga koowaad ee safarka uu Madaxweyne Erdogan ku marayo gobolka, kaas oo diiradda lagu saarayo xoojinta xiriirka siyaasadeed iyo dhaqaale.
Madaxweynaha Turkiga Recep Tayyip Erdogan ayaa Talaadadii magaalada Riyadh kula kulmay Dhaxal-sugaha Boqortooyada Sacuudiga Mohammed bin Salman, sida uu sheegay Madaxa Isgaarsiinta Turkiga Burhanettin Duran.
Erdogan oo booqasho rasmi ah ku jooga Sacuudiga, ayaa waxaa safarkiisa ku weheliya xaaskiisa Marwada Koowaad Emine Erdogan, Wasiirka Arrimaha Dibadda Hakan Fidan, Wasiirka Maaliyadda Mehmet Simsek, Wasiirka Difaaca Yasar Guler, iyo wasiirro kale.
Faahfaahin dheeraad ah lagama bixin kulanka albaabadu u xirnaayeen ee dhexmaray Erdogan iyo Salman.
Kaddib kulanka, Madaxweyne Erdogan ayaa ka qeyb galay casho sharafeed albaabadu u xirnaayeen oo uu Amiir Salman ugu sameeyay Qasriga Yemame.
Erdogan ayaa sidoo kale horraantii maalintaas lagu soo dhaweeyay xaflad rasmi ah oo uu qabtay Boqor Salman.
Booqashadan ayaa ah wajiga koowaad ee safarka Madaxweynaha Turkiga uu ku marayo dalal ka tirsan gobolka.
Safarka Qaahira
Madaxweynaha Turkiga ayaa Arbacada u safri doona magaalada Qaahira, kaddib martiqaad uu ka helay Madaxweynaha Masar Abdel Fattah el Sisi, si ay si wadajir ah u guddoomiyaan kulanka labaad ee Golaha Iskaashiga Istiraatiijiyadeed ee Heer Sare ee Turkiga iyo Masar, sida uu sheegay Burhanettin Duran.
Inta lagu guda jiro booqashada Masar, Erdogan iyo Sisi ayaa la filayaa inay ka wada hadlaan arrimaha labada dal iyo inay is dhaafsadaan aragtiyo ku saabsan horumarrada gobolka iyo kuwa caalamiga ah, iyadoo si gaar ah diiradda loo saarayo Falastiin, ayuu intaas ku daray Duran.
Erdogan ayaa sidoo kale qorsheynaya inuu ka qeybgalo Madasha Ganacsiga ee Turkiga iyo Masar inta uu ku sugan yahay Qaahira, ayuu raaciyay.