Turkiga ayaa si kulul u cambaareeyay weerarkii ugu dambeeyay ee maleeshiyada Xuutiyiintu ku qaadeen Garoonka Diyaaradaha Caalamiga ah ee King Khalid ee magaalada Riyadh, caasimadda Sacuudi Carabiya, sida ay sheegtay Wasaaradda Arrimaha Dibadda Turkiga.

“Waxaan si adag u cambaareyneynaa weerarka ay Xuutiyiintu mar kale ku bartilmaameedsadeen Garoonka Diyaaradaha Caalamiga ah ee King Khalid ee Riyadh, caasimadda Sacuudi Carabiya,” ayay wasaaraddu ku sheegtay bayaan ay soo saartay Axaddii.

Turkiga ayaa tacsi u diray qoysaska dadkii ku dhintay weerarka, isagoo dadka dhaawacmay u rajeeyay caafimaad degdeg ah, isla markaana murugada la wadaagay shacabka Sacuudi Carabiya.

Wasaaradda ayaa sheegtay in weerarrada si ula kac ah loogu bartilmaameedsado kaabeyaasha dhaqaalaha ee rayidka iyo dadka rayidka ah ee aan waxba galabsan ay yihiin xadgudubyo cad oo ka dhan ah sharciga caalamiga ah iyo mabaadi’da sharciga caalamiga ah ee bani’aadannimada.

“Waa in si degdeg ah loo joojiyaa falalka khatarta ku ah amniga iyo xasilloonida gobolka, isla markaana wiiqaya dadaallada wadajirka ah ee beesha caalamka ee lagu doonayo in nabad lagu soo dabaalo,” ayay wasaaraddu sheegtay.

Turkiga ayaa sidoo kale mar kale xaqiijiyay taageerada uu u hayo madax-bannaanida iyo midnimada dhuleed ee Sacuudi Carabiya.

Madaxa Isgaarsiinta Madaxtooyada Turkiga, Burhanettin Duran, ayaa isaguna bayaan uu ku baahiyay barta X ku cambaareeyay weerarrada.

“Waxaan si kulul u cambaareynayaa weerarrada lagu bartilmaameedsaday dadka rayidka ah iyo garoomada diyaaradaha ee Sacuudi Carabiya, kuwaas oo sababay dhimasho iyo dhaawac,” ayuu yiri.

Duran ayaa ugu baaqay beesha caalamka inay mowqif mideysan oo adag ka qaadato weerarrada lagu doonayo in gobolka lagu riixo colaado iyo qalalaase cusub, isagoo carrabka ku adkeeyay in tallaabadaasi muhiim u tahay ilaalinta nabadda gobolka.

Wuxuu sidoo kale tacsi u diray shacabka Sacuudi Carabiya, isagoo dadka dhaawacmay u rajeeyay caafimaad degdeg ah.

Ugu yaraan 12 qof ayaa ku dhintay, 309 kalena way ku dhaawacmeen weerar ay maleeshiyada Xuutiyiintu Sabtidii ku qaadeen Garoonka Diyaaradaha Caalamiga ah ee King Khalid ee magaalada Riyadh.