Wasiirka Gaashaandhigga ee Dowladda Federaalka Soomaaliya, Axmed Macallin Fiqi, ayaa maanta xafiiskiisa ku qaabilay Danjiraha Jamhuuriyadda Turkiga u fadhiya Soomaaliya, Alper Aktaş, iyo sidoo kale Jeneraal Sebahattin Kalkan, madaxa TÜRKSOM.
Wadahadalladu waxay diiradda saareen xoojinta iskaashiga militari ee u dhexeeya labada dal, gaar ahaan tababarka Ciidanka Xoogga Dalka Soomaaliyeed, kor u qaadidda awoodahooda difaac, iyo xoojinta iskaashi istaraatiiji ah.
Wasiir Fiqi ayaa uga mahadceliyay Danjiraha iyo wafdigiisa taageerada joogtada ah iyo tan dhinacyada badan leh ee Turkigu siiyo shacabka iyo dowladda Soomaaliya.
Wuxuu sidoo kale carrabka ku adkeeyay in xiriirka xooggan ee laba geesoodka ah ee u dhexeeya Soomaaliya iyo Turkiga uu caqabad ku noqon doono kuwa kasoo horjeeda horumarka Soomaaliya.
Gabagabadii, Wasiir Fiqi ayaa u mahadceliyay dhammaan bahwadaagta caalamiga ah ee dhinaca amniga ee Soomaaliya taageerada qiimaha leh ee ay ka geystaan dib-u-dhiska Ciidamada Qalabka Sida ee Qaranka iyo dadaallada socda ee ka dhanka ah argagixisada.
