Wasaaradda Arrimaha Dibadda Suudaan ayaa Isniintii ku dhawaaqday in dalkaasi uu dib u bilaabay ka-qaybgal buuxa oo uu ku leeyahay Urur-Goboleedka Horumarinta Bariga Afrika (IGAD), laba sano kaddib markii uu hakiyay xubinnimadiisa ururka.

Dowladda Suudaan ayaa sheegtay inay go’aansatay dib u hawlgelinta doorkeeda IGAD, kaddib “war-saxaafadeed togan” oo ka soo baxay Xoghaynta Guud ee ururka, kaas oo mar kale xaqiijiyay u hoggaansanaanta qaab-dhismeedyadii aasaaska u ahaa iskaashiga gobolka, sida lagu sheegay bayaanka wasaaradda.

Bayaanka ayaa intaas ku daray in “ururku ballanqaaday inuusan faragelin arrimaha gudaha ee dalalka xubnaha ka ah, isla markaana uu si buuxda u aqoonsan yahay madaxbannaanida Suudaan, wadajirkeeda dhuleed, midnimadeeda qaran iyo badbaadada hay’adaha dowladeed ee jira.”

Suudaan ayaa sidoo kale sheegtay in nabadda iyo amniga caalamiga ah ay weli ka mid yihiin “mudnaanta ugu sarreysa,” isla markaana ay dadaal kasta ku bixinayso ilaalintooda heer gobol iyo heer caalamiba, iyadoo xustay in iskaashiga gobolka uu yahay tiirka ugu muhiimsan ee is-dhexgalka caalamiga ah.

Khartoum ayaa hakisay xubinnimadeeda IGAD kaddib markii ay 20-kii Janaayo 2024 ku dhawaaqday go’aankaas, iyadoo ku sababbaysay waxa ay ku tilmaantay ku-tallaabsiyo ka yimid ururka, oo ay ka mid ahayd in xaaladda Suudaan lagu daro ajandaha shirkii 42-aad ee IGAD iyada oo aan wax wadatashi ah laga sameyn.