Dawladaha Islaamka oo cambaareeyay go’aanka Israa’iil ay kula wareegaysto dhulka Daanta Galbeed
Sideed wasiirro arrimaha dibadda ah ayaa bayaan wadajir ah ku sheegay in Israa’iil ay adeegsanayso tallaabooyin sharci darro ah si ay u xoojiso gacan ku haynta Dhulka Falastiin ee la haysto.
Wasiirrada Arrimaha Dibadda ee Turkiga, Masar, Urdun, Indooniisiya, Bakistaan, Qadar, Sacuudiga iyo Imaaraadka Carabta, ayaa Talaadadii soo saaray bayaan wadajir ah oo ay ku cambaareynayaan go’aanka Israa’iil ay ku sheegtay qaybo ballaaran oo ka mid ah Daanta Galbeed ee la haysto inay yihiin “dhul dowladeed,” iyagoo ku tilmaamay tallaabadaas mid sii hurinaysa xiisadda, jebinaysa sharciga caalamiga ah isla markaana wiiqaysa rajada nabadda.
Sida lagu sheegay bayaan rasmi ah oo ay soo saartay Wasaaradda Arrimaha Dibadda Turkiga, wasiirrada siddeedda dal ayaa dhaliilay ansixinta Israa’iil ee habraacyada lagu diiwaangelinayo lana dejinayo lahaanshaha dhulka ee meelo ballaaran oo ka mid ah Daanta Galbeed ee la haysto, taasoo noqoneysa tallaabadii ugu horreysay ee noocan ah tan iyo 1967.
Wasiirradu waxay sheegeen in tallaabadu tahay mid sharci darro ah, iyagoo ka digay inay dedejin doonto ballaarinta deegaannada la dejinayo iyo la wareegista dhulka.
“Tallaabadan sharci darrada ah waxay ka dhigan tahay koror halis ah oo lagu dardargelinayo hawlaha dejinta sharci darrada ah, la wareegista dhulka, xoojinta gacanta Israa’iil iyo ku dabaqidda madaxbannaani sharci darro ah dhulka Falastiin ee la haysto,” ayaa lagu yiri bayaanka wadajirka ah.
Ka hor imaanshaha sharciga caalamiga ah
Dalalka saxiixay bayaanka ayaa sheegay in go’aankani uu jebinayo sharciga caalamiga ah ee bani’aadannimada, oo ay ku jirto Heshiiska Afaraad ee Geneva, iyo sidoo kale qaraarrada la xiriira ee Golaha Ammaanka ee Qaramada Midoobay, “ugu horreyn Qaraarka 2334,” kaas oo ku baaqaya in Israa’iil joojiso hawlaha dejinta.
Bayaanka ayaa sidoo kale tixraacay aragti talo bixin ah oo ka soo baxday Maxkamadda Caalamiga ah ee Caddaaladda (ICJ), isagoo sheegay in tallaabadu ay ka hor imanayso go’aaminta in siyaasadaha wax ka beddelaya xaaladda sharci, taariikheed iyo demoqraafiyeed ee dhulka la haysto ay yihiin kuwo sharci darro ah.
Wasiirradu waxay ka digeen in tallaabadani u muuqato mid lagu doonayo in lagu soo rogo “xaalad sharci iyo maamul oo cusub” oo khatar gelinaysa suuragalnimada xal laba dowladood ah isla markaana sii xumeyn karta xasilloonida gobolka.
Iyagoo mar kale caddeeyay diidmadooda tallaabooyinka hal dhinac ah, wasiirradu waxay ugu baaqeen beesha caalamka inay qaado “tallaabooyin cad oo go’aan leh” si loo joojiyo xadgudubyada loona ilaaliyo xuquuqda Falastiiniyiinta, oo ay ku jirto xaqa is-maamulidda iyo dhisidda dowlad madax-bannaan oo ku saleysan xuduudihii 4-ta Juun 1967, iyadoo Bariga Qudus ay noqoneyso caasimaddeeda.