Danjiraha Soomaaliya u fadhiya dalka Liibiya, Cabdifataax Sheekh Axmed, ayaa Axaddii la kulmay Al-Taher Al-Baour, oo ah mas’uulka u qaabilsan Wasaaradda Arrimaha Dibadda iyo Iskaashiga Caalamiga ah ee Liibiya, iyadoo kulankaasi qayb ka ahaa billowga gudashada waajibaadka diblomaasiyadeed ee danjiraha ee Liibiya.

Kulanka ayaa diiradda lagu saaray xiriirka soo jireenka ah ee u dhexeeya Soomaaliya iyo Liibiya, iyadoo sidoo kale laga wada hadlay sidii loo xoojin lahaa loona ballaarin lahaa iskaashiga labada dal ee dhinacyo kala duwan.

Intii ay wada hadalladu socdeen, labada dhinac waxay isku raaceen in la xoojiyo isku-duwidda dhinaca diblomaasiyadda si loo fududeeyo hirgelinta heshiisyadii hore u dhexmaray labada dal, isla markaana loo diyaariyo qabsoomidda Shirka Guddiga Wadajirka ah ee Soomaaliya iyo Liibiya sida ugu dhaqsaha badan.

Mas’uuliyiintu waxay sidoo kale dib u eegis ku sameeyeen qabanqaabada booqashada la filayo inuu Ra’iisul Wasaaraha Soomaaliya, Xamza Cabdi Barre, ku tago dalka Liibiya, taas oo la filayo inay sii xoojiso iskaashiga labada dal.

Gabagabadii kulanka, labada dhinac waxay mar kale xaqiijiyeen sida ay uga go’an tahay sii wadidda wadatashiga iyo isku-duwidda joogtada ah si loo xoojiyo iskaashiga laba geesoodka ah, loo gaarsiiyo xiriirka labada dal heerar sare, looguna adeego danaha wadajirka ah ee labada dal iyo shacabkooda walaalaha ah, iyadoo sidoo kale la adkeynayo xiriirka saaxiibtinimo iyo iskaashi ee ka dhexeeya.

Kulanka waxaa sidoo kale ka qayb galay Agaasimaha Waaxda Arrimaha Carabta ee Wasaaradda Arrimaha Dibadda Liibiya, Najib Al-Rayyani, iyo Malik Al-Asifer, oo ah mas’uulka u qaabilsan arrimaha Soomaaliya ee Wasaaradda Arrimaha Dibadda iyo Iskaashiga Caalamiga ah ee Liibiya.