Hay’adda Isgaarsiinta Qaranka (NCA) ayaa qabatay Shirweynaha Labaad ee Garaad Gacmeedka ee Soomaaliya 2026, oo ah madal qaran oo loogu talagalay in lagu falanqeeyo doorka Garaad Gacmeedka (Artificial Intelligence - AI) ee horumarinta adeegyada dowladda, dhiirrigelinta hal-abuurka, dardargelinta isbeddelka dijitaalka ah, iyo kobcinta horumarka dhaqan-dhaqaale ee Soomaaliya.
Shirkan oo soconaya laba maalmood ayaa waxaa soo qabanqaabiyay Hay’adda Isgaarsiinta Qaranka (NCA) iyadoo kaashanaysa Bulshada AI Soomaaliya (AI Somalia Community), isla markaana si dhow ula shaqeynaysa Jaamacadda Zamzam ee Sayniska iyo Teknoolojiyadda (ZUST) iyo Jaamacadda Ummadda Soomaaliyeed (SNU), kuwaas oo si wadajir ah uga qayb qaatay qabanqaabada munaasabaddan.
Shirweynaha ayaa waxaa si rasmi ah u furay Wasiirka Waxbarashada, Hiddaha iyo Tacliinta Sare ee Dowladda Federaalka Soomaaliya, Faarax Sheekh Cabdulqaadir Maxamed, kaas oo carrabka ku adkeeyay muhiimadda ay leedahay in si istaraatiiji ah looga faa’iidaysto fursadaha uu bixiyo Garaad Gacmeedka si loo xoojiyo waxbarashada, cilmi-baarista, hal-abuurka, iyo dhaqaalaha ku dhisan aqoonta.
Munaasabadda furitaanka ayaa waxaa sidoo kale ka hadlay:
Dr. Maxamuud Maxamed Xassan (Harbi), Guddoomiyaha Jaamacadda Zamzam ee Sayniska iyo Teknoolojiyadda.
Prof. Dr. Maxamed Maxamuud Maxamed, Guddoomiyaha Jaamacadda Ummadda Soomaaliyeed.
Mustafa Yaasiin Sheekh, Agaasimaha Guud ee Hay’adda Isgaarsiinta Qaranka.
Wasiir Ku-xigeenka Wasaaradda Isgaarsiinta iyo Teknoolojiyadda, Axmed Ismaaciil Diiriye.
Dhammaan ka qaybgalayaasha ayaa iftiimiyey fursadaha iyo muhiimadda Garaad Gacmeedka ee qaabeyn kara mustaqbalka Soomaaliya isla markaana dardargelin kara horumarka qaranka.
Shirkan ayaa waxaa ka qayb galay mas’uuliyiin sare oo ka tirsan Dowladda Federaalka Soomaaliya, madaxda hay’adaha dowladda, wakiillo ka socda jaamacadaha iyo xarumaha tacliinta sare, cilmi-baarayaal, khubaro tiknoolojiyadeed, hal-abuurayaal, ganacsato, ururrada bulshada rayidka ah, arday, iyo daneeyayaal kale.
Mudada labada maalmood ah ee shirku socday, ka qaybgalayaashu waxay ka doodayeen arrimo ay ka mid yihiin: Maamulka iyo sharciyeynta Garaad Gacmeedka (AI Governance and Regulation), Adeegsiga AI ee adeegyada dowladda, AI iyo waxbarashada, AI iyo caafimaadka, AI iyo beeraha, Amniga internetka (Cybersecurity), Ilaalinta xogta (Data Protection), Xuquuqda dijitaalka ah, Horumarinta AI-ga ku shaqeeya luqadda Soomaaliga iyo Hal-abuurka iyo dhaqaalaha dijitaalka ah.
Shirweynahan ayaa ujeeddadiisu tahay inuu noqdo madal wadajir ah oo isu keenta hay’adaha dowladda, jaamacadaha, cilmi-baarayaasha, hal-abuurayaasha, ganacsiga gaarka loo leeyahay, iyo bahwadaagta horumarinta si loo dhiirrigeliyo xalal wax ku ool ah oo ku dhisan Garaad Gacmeedka, kuwaas oo wax ka qaban kara mudnaanta horumarineed ee Soomaaliya isla markaana taageeri kara koboc loo dhan yahay oo waara.
