Ciidanka Suudaan ayaa la wareegay gacan-ku-haynta deegaanka Bir Kelekel ee gobolka Galbeedka Daarfuur, kaddib dagaallo ay la galeen Ciidamada Gurmadka Degdegga ah (RSF), sida uu Arbacadii sheegay mas’uul Suudaani ah.
Guddoomiyaha gobolka Galbeedka Daarfuur, Bahr al-Din Adam Karama, ayaa bayaan uu soo saaray ku sheegay in ciidanka iyo xoogagga xulafada la ah ay “horumar la taaban karo” ka sameeyeen deegaanka Bir Kelekel, oo ku yaalla qaybta bari ee degmada Jebel Moon.
Karama ayaa la wareegidda deegaanka ku tilmaamay horumar muhiim u ah dowladda Suudaan, isagoo sheegay in deegaankani leeyahay muhiimad istaraatiiji ah, maadaama uu ku dhow yahay Jebel Moon.
Wuxuu sheegay in hawlgallada milatari ee jiidda Galbeedka Daarfuur ay u socdaan sidii loo qorsheeyay, si dib loogu soo celiyo amniga, loona ilaaliyo midnimada iyo madaxbannaanida Suudaan.
Askarta ciidanka Suudaan ayaa sidoo kale baraha bulshada ku baahiyay muuqaallo ay ku shaacinayaan in ciidamadoodu la wareegeen gacan-ku-haynta Bir Kelekel.
Ciidanka Wadajirka ah ee kooxaha hubeysan ee xulafada la ah ciidanka Suudaan ayaa 5-tii Oktoobar ku dhawaaqay in ciidamadooda iyo ciidanka Suudaan ay la wareegeen deegaanka Bir Saliba ee Galbeedka Daarfuur, kaddib dagaallo ay la galeen RSF.
Suudaan oo ka kooban 18 gobol, Ciidamada Gurmadka Degdegga ah (RSF) ayaa gacanta ku haya dhammaan shanta gobol ee gobolka Daarfuur ee galbeedka dalka, marka laga reebo qaybo ka mid ah Waqooyiga iyo Galbeedka Daarfuur oo weli ku jira gacanta ciidanka Suudaan. Ciidanka Suudaan ayaa gacanta ku haya inta badan 13-ka gobol ee kale, oo ay ku jirto caasimadda Khartuum.
Suudaan ayaa tan iyo bishii Abriil 2023 waxaa ka socday dagaal u dhexeeya ciidanka dalkaas iyo RSF, kaas oo ka dhashay khilaaf ku saabsan isku-darka labada ciidan. Dagaallada ayaa sababay dhimashada tobannaan kun oo qof iyo barakaca 13 milyan oo qof.
