Madaxweyne Xasan Sheekh oo la kulmay Guddoomiyaha Guddiga Midowga Afrika Maxamuud Cali

Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa kulan miro-dhal ah la yeeshay Guddoomiyaha Guddiga Midowga Afrika, Mudane Maxamuud Cali Yuusuf, intii lagu guda jiray Kalfadhiga 39-aad ee Shirweynaha Hoggaamiyeyaasha Midowga Afrika oo ka dhacay xarunta AU ee Addis Ababa.

Guddoomiyuhu ayaa ugu hambalyeeyay Soomaaliya doorashadeedii dhawaan ee Golaha Nabadda iyo Ammaanka Midowga Afrika, isagoo xusay in guushan ay ka tarjumayso kaalinta sii kordheysa ee dalka ee arrimaha nabadda iyo ammaanka qaaradda. Wuxuu mar kale xaqiijiyay taageerada AU ee ku aaddan madax-bannaanida, midnimada iyo wadajirka dhuleed ee Soomaaliya.

Sidoo kale wuxuu tilmaamay dadaallada socda ee wax looga qabanayo caqabadaha dhaqaale ee saameeyay Howlgalka Taageerada iyo Xasillinta Midowga Afrika ee Soomaaliya (AUSSOM), iyadoo la xoojinayo waxtarkiisa hawlgal iyo qaybaha rayidka.

Guddoomiyuhu wuxuu sidoo kale ku bogaadiyay Dowladda Federaalka Soomaaliya horumarinta wada-hadallada siyaasadeed ee loo dhan yahay iyo diyaar-garowga doorashooyinka soo socda, isagoo ku tilmaamay tallaabooyin muhiim u ah xoojinta nabad waarta, xasillooni iyo horumar.

Dhankiisa, Madaxweyne Xasan Sheekh Maxamuud ayaa muujiyay mahadnaq ku aaddan taageerada joogtada ah ee mabda’a ku dhisan ee Midowga Afrika, isagoo ammaanay doorka ay AU ku leedahay nabadda, xasilloonida iyo dhismaha dowladnimada Soomaaliya. Wuxuu caddeeyay sida ay Soomaaliya uga go’an tahay inay sii xoojiso wada shaqeynta Midowga Afrika si loo horumariyo ajandayaasha guud ee qaaradda, isla markaana soo dhaweeyay ka go’naanshaha joogtada ah ee Midowga Afrika ee taageerada gurmadka bani’aadannimo iyo dhismaha adkeysiga Soomaaliya.