Dhakhaatiirta Suudaan oo ka digaya xaaladda carruurta iyo haweenka ku go’doonsan Galbeedka Kordofan
Muuqaallo ay RSF ku baahisay baraha bulshada ayaa muujiyay tiro badan oo haween iyo carruur ah oo ku jira xaalad bani’aadamnimo oo aad u liidata gudaha saldhigga.
Ururka Dhakhaatiirta Suudaan ayaa Arbacadii sheegay inuu aad uga walaacsan yahay xaaladda aan la garanayn ee tobannaan carruur iyo haween ku go’doonsan magaalada Babnousa ee Galbeedka Kordofan, kadib dagaallo u dhexeeyay ciidanka Suudaan iyo malleeshiyada RSF.
Magaalada Babnousa waxaa ka dhacay dagaal culus, waxaana khatar ku jira qoysaskii magan-gelyo doonka ahaa ee ku sugnaa xarunta Qaybta 22-aad ee ciidamada, kadib markii RSF ay la wareegtay magaalada, sida lagu sheegay bayaan ka soo baxay shabakadda Dhakhaatiirta Suudaan.
Muuqaallo ay RSF ku baahisay baraha bulshada ayaa muujiyay tiro badan oo haween iyo carruur ah oo ku jira xaalad bani’aadamnimo oo aad u liidata gudaha saldhigga.
Ururka dhaqaatiirta ayaa ku baaqday in la xaqiijiyo “badbaadadooda, ilaalintooda, iyo in loo raro meel ammaan ah, iyadoo aan la dhibaateyn ama si sharci-darro ah loo xirin iyadoo lagu eedeeyo inay yihiin qaraabada ciidanka.”
Ururku wuxuu sidoo kale dalbaday marinno ammaan ah oo dadka lagu daadgureeyo iyo gargaar bani’aadamnimo oo degdeg ah.
Ururku wuxuu ugu baaqay beesha caalamka inay cadaadis saarto hoggaanka RSF si haweenka iyo carruurta looga daadgureeyo meelaha u dhow goobaha dagaalka.
Arbacadii, ciidamada Suudaan waxay sheegeen inay ka hortageen weerar cusub oo RSF ku qaaday Babnousa, maalin kadib markii RSF ay ku dhawaaqday inay la wareegtay magaalada iyo saldhigga Qaybta 22-aad.
RSF ayaa toddobaadkii hore dhowr weerar ku qaaday Babnousa iyagoo magaalada ku hayay go’doon adag, taas oo shaki gelisay sheegashadii hoggaamiye Dagalo ee ahayd inuu aqbalay xabbad-joojin bani’aadamnimo oo saddex bilood ah.
Maalmahan, ciidamada cirka ee dowladda ayaa sahay u soo daadinayay ciidankooda ku jira magaalada, halka tiro badan oo dadka magaalada ah ay hore uga qaxeen — in ka badan 177,000 qof, sida ay sheegeen guddiyada gurmadka.
Dowladdu waxay sheegtay inay diyaar u tahay wadahadalka RSF, balse waxay ku adkaysatay in malleeshiyadu ay ka baxdo dhammaan magaalooyinka iyo goobaha rayidka si qoysasku dib ugu laaban karaan guryahooda.
Dagaalka u dhexeeya ciidanka Suudaan iyo RSF, oo billowday Abriil 2023, ayaa lagu dilay ugu yaraan 40,000 qof, waxaana ku barakacay 12 milyan oo qof, sida ay sheegtay Hay’adda WHO.