Guddoomiyaha cusub ee la doortay ee Golaha Shacabka Baarlamaanka Federaalka Soomaaliya, Cabdulqaadir Maxamed Nuur Jaamac, ayaa maanta oo Arbaco ah si rasmi ah ula wareegay xilka, kadib munaasabad ka dhacday xarunta Guddoonka iyo Guddiyada ee Villa Hargeysa, magaalada Muqdisho.
Munaasabadda xil-wareejinta ayaa ahayd mid kooban oo ay goobjoog ka ahaayeen xubnaha kale ee hoggaanka baarlamaanka, oo ay hormuud u ahaayeen Guddoomiye Ku-xigeenka Koowaad ee Golaha Shacabka, Sacdiya Yaasiin Xaaji Samatar, iyo Guddoomiye Ku-xigeenka Labaad, Cabdullaahi Cumar Abshirow, iyo xubno kale oo ka tirsan mas'uuliyiinta Golaha.
Intii ay munaasabaddu socotay, Guddoomiye Ku-xigeenka Labaad, Cabdullaahi Cumar Abshirow, oo madasha ka hadlay ayaa bogaadiyay shaqadii uu qabtay Guddigii Doorashada.
Wuxuu si gaar ah u ammaanay Sacdiya Yaasiin Samatar oo uu ku tilmaamay inay muujisay hoggaamin iyo shaqo wanaag intii ay haysay xilka Kusimaha Guddoomiyaha Golaha Shacabka.
Dhankeeda, Sacdiya Samatar ayaa guddiga doorashada ku ammaantay habkii hufnaa ee ay u maamuleen doorashadii guddoonka, iyadoo hoosta ka xarriiqday muhiimadda ay leedahay wada-shaqaynta iyo sii ambaqaadidda shaqooyinka adag ee horyaalla baarlamaanka.
Guddoomiyaha cusub ee Golaha Shacabka, Cabdulqaadir Maxamed Nuur Jaamac, oo gunaanadkii xafladda hadal jeediyay, ayaa isna dhankiisa uga mahadceliyay Guddoomiye Ku-xigeenka Koowaad sida ay u maareysay xilligii kala-guurka iyo howlaha Golaha.
Wuxuu ballanqaaday inuu Golaha Shacabka ku hoggaamin doono nidaam ku dhisan caddaalad, hufnaan iyo wadajir.
Isagoo ka hadlayay mudnaantiisa shaqo, ayuu Guddoomiye Jaamac sheegay inuu diiradda saari doono xoojinta shaqada sharci-dejinta, ilaalinta doorka dastuuriga ah ee baarlamaanka iyo u-adeegidda danta guud.
Wuxuu sidoo kale ugu baaqay dhammaan xildhibaannada inay muujiyaan wadashaqayn buuxda, kana qayb qaataan gudashada waajibaadka dastuuriga ah iyo xaqiijinta yoolalka uu hiigsanayo Golaha Shacabka.
