Diyaarad rakaab ah oo siday 55 qof ayaa Talaadadii ka baxday dhabbaha ay ku oroddo ee Garoonka Diyaaradaha Caalamiga ah ee Aadan Cabdulle ee Muqdisho, iyadoo dhammaan dadkii saarnaa si nabad ah looga soo daad-gureeyay, sida ay sheegeen mas’uuliyiintu.
Wasiirka Gaadiidka iyo Duulista Hawada ee Jamhuuriyadda Federaalka Soomaaliya, Xildh Maxamed Faarax Nuux, oo kormeer ku tegay goobta uu shilku ka dhacay, ayaa faahfaahin ka bixiyay shilkan diyaaradeed ee ka dhacay Garoonka Caalamiga ah ee Aadan Cadde.
Wasiir Maxamed Faarax Nuux ayaa xaqiijiyay in gurmad degdeg ah loo fidiyey rakaabka iyo shaqaalaha diyaaradda, islamarkaana sheegay in baaritaan dhamaystiran lagu samayn doono sababta rasmiga ah ee keentay ciladda iyo shilkaas.
Dhanka kale, warbixin ay soo saartay Hay’adda Duulista Rayidka Soomaaliyeed (SCAA) ayaa lagu sheegay in diyaaradda ay ahayd nooca F50, iyadoo xaqiijisay in dhammaan rakaabka loo qaaday isbitaal ku dhow si loo qiimeeyo xaaladdooda caafimaad.
Hay’addu waxay sheegtay in mas’uuliyiintu ay durba goobta gaareen, islamarkaana ay wadaan baaritaan ku saabsan sababta keentay dhacdada, iyadoo la kaashanayo hay’adaha ay khusayso si loo ururiyo loona falanqeeyo xogta la xiriirta shilka.
