Dajiraha Safaaradda Soomaaliya ee Yemen, Cabdixakiin Maxamed Axmed, ayaa gaaray gobolka Xadramout ee Yemen, halkaas oo si diirran loogu soo dhaweeyay xubno ka tirsan bulshada Soomaaliyeed.
Intii uu booqashada ku jiray, Danjiraha ayaa ka qayb galay munaasabad Afur ah oo ay soo qabanqaabisay bulshada Soomaaliyeed, taasoo fursad u noqotay in la is dhaafsado aragtiyo ku saabsan xaaladda dalka iyo arrimaha la xiriira muwaadiniinta Soomaaliyeed ee ku nool Yemen.
Khudbad kooban oo uu ka jeediyay kulanka, Danjire Cabdixakiin Maxamed Axmed ayaa ku celiyay in safaaraddu ay ka go’an tahay taageeridda muwaadiniinta Soomaaliyeed ee ku nool dibadda iyo hubinta inay helaan adeegyada muhiimka ah.
“Waxaan mataleynaa shacabka Soomaaliyeed, waxaana diyaar u nahay inaan meel kasta ku qaabilno muwaadiniinta Soomaaliyeed si loo fududeeyo adeegyada kala duwan ee ay u baahan yihiin.”
Danjiraha ayaa sidoo kale ku dhawaaqay in gobolka Xadramout dhawaan laga bilaabi doono bixinta baasaboorrada Soomaaliya iyo dukumiintiyada kale ee muhiimka ah ee loogu talagalay xubnaha bulshada Soomaaliyeed ee ku nool Yemen, tallaabadaas oo la filayo inay fududeyso helitaanka adeegyada dowladda.
Munaasabadda Afurka waxaa soo qabanqaabisay Marwo Suleeq Cumar Cali, oo ka shaqeysa isku dubbaridka arrimaha bulshada, gaar ahaan hawlaha bulshada iyo hindisayaasha lagu xoojinayo horumarinta bulshada.
