Madaxweynaha Maraykanka Donald Trump ayaa sheegay in dagaalka Maraykanka iyo Israa’iil ay la galeen Iiraan uu gebabao ku dhow yahay, isagoo tilmaamay in dagaalku u socdo si ka dhakhso badan sidii markii hore la filayay.
Isagoo Isniintii khadka telefoonka ugu warramayey CBS News, Trump ayaa sheegay in si weyn loo wiiqay awoodda militariga ee Iiraan.
“Waxaan u maleynayaa in dagaalka xooggiisii gebagabo ku dhow yahay. Ma haystaan ciidan badeed, ma haystaan isgaarsiin, mana haystaan ciidan cirka ah,” ayuu yiri Trump, isagoo ku celceliyay qiimeynta khasaaraha dagaalka ee uu sheegay maalmahan la soo dhaafay.
Wuxuu intaas ku daray in Maraykanku uu “aad uga horreeyo” waqtigii uu markii hore sheegay ee ahaa afar ilaa shan toddobaad oo uu dagaalku socon doono.
Carqalad ku timid marin-biyood istaraatiiji ah
Hadallada Trump ayaa yimid xilli suuqyada saamiyada uu dagaalku si xooggan u saameeyey.
Qiimaha shidaalka ayaa Isniintii kor u dhaafay $100 fuustadii — heerkii ugu sarreeyay tan iyo markii uu bilaabmay dagaalka Ukraine 2022 — kadib markii dagaalka Iiraan uu sababay in inta badan maraakiibta shidaalka laga xannibo Marinka Hormuz.
Marinkan istaraatiijiga ah ayaa caadi ahaan qaada ku dhowaad 20 boqolkiiba sahayda shidaalka ceeriin ee caalamka.
Suuqyada shidaalka iyo siyaasiyiin caalamka ah ayaa si dhow ula socda saameynta colaaddan ay ku yeelan karto kaabayaasha tamarta ee Khaliijka.
Qiimaha shidaalka caalamiga ah ayaa kordhay inta u dhaxaysa 40 ilaa 50 boqolkiiba tan iyo markii Maraykanka iyo Israa’iil ay weerarrada ku qaadeen Iiraan 28-ka Febraayo.
Kororka qiimaha ayaa durba walaac ka dhaliyay dowladaha iyo macaamiisha caalamka, iyadoo kororka qiimaha shidaalku uu sababay safaf dhaadheer oo ka jira saldhigyada shidaalka ee dalal ay ka mid yihiin Vietnam iyo Filibiin.
Yurub gudaheeda, Hungary iyo Croatia ayaa soo rogay xadidaad qiimaha shidaalka si loo xakameeyo kharashaadka sii kordhaya.
