Magaalada Muqdisho ayaa maalintii Arbacada lagu qabtay munaasabad sagootin ah oo si weyn loo soo agaasimay, taas oo loo sameeyay Safiirka dowladda Turkiga u fadhiya Soomaaliya, Danjire Alper Aktaş, xilli uu soo gaba-gabeynayo muddo-xileedkiisii diblumaasiyadeed ee uu dalka ka hayay in ka badan laba sano.

Guddoomiyaha Gobolka Banaadir ahna Duqa Caasimadda Muqdisho, Dr. Xasan Maxamed Xuseen (Muungaab), ayaa munaasabaddan ku qabtay xarunta dowladda hoose ee Xamar, isagoo safiirka ku maamuusay doorkii firfircoonaa ee uu ka qaatay sii xoojinta xiriirka saaxiibtinimo iyo iskaashiga istiraatiijiga ah ee u dhexeeya Soomaaliya iyo Turkiga.

Guddoomiye Muungaab ayaa hoosta ka xarriiqay in munaasabaddan sagootinta ah ay ka tarjumeyso qotada xiriirka labada dal, iyo kalsoonida soo jireenka ah ee saldhigga u ah iskaashiga dhinacyada diblumaasiyadda, amniga iyo horumarinta.

Danjire Alper Aktaş ayaa waraaqihiisa aqoonsiga danjirenimo u gudbiyay Madaxweynaha Jamhuuriyadda Federaalka Soomaaliya, Xasan Sheekh Maxamuud, bishii Maarso ee sannadkii 2024, xilligaas oo uu si rasmi ah u guda-galay gudashada waajibaadkiisa safiirnimo ee dalka.

Isla maalintii Arbacada, Wasiirka Arrimaha Dibadda iyo Iskaashiga Caalamiga ah ee Soomaaliya, Cabdisalaan Cabdi Cali, ayaa isaguna xafiiskiisa kulan sagootin ah kula yeeshay safiirka, iyadoo labada mas’uul ay mar kale adkeeyeen xiriirka dhow iyo iskaashiga sii ballaaranaya ee u dhexeeya Muqdisho iyo Ankara.

Mas’uuliyiintii kala duwanaa ee ka hadlay munaasabadda ayaa si isku mid ah u bogaadiyay shaqadii hufneyd ee uu Danjire Aktaş ka qabtay horumarinta iskaashiga labada dowladood, gaar ahaan mashaariicda dib-u-dhiska, tayeynta adeegyada bulshada, horumarinta dhaqaalaha iyo taageerada dhanka amniga.

Duqa Muqdisho ayaa si gaar ah dowladda iyo shacabka Turkiga uga mahadceliyay taageerada hagar la’aaneed iyo garab-istaagga joogtada ah ee ay u fidiyaan Soomaaliya, isagoo xusay in xiriirka labada dal uu ku qotomo taariikh-wadaag, is-aaminaad buuxda iyo iskaashi istiraatiiji ah oo labada dhinacba waxtar u leh.

Dowladda Turkiga ayaa door muuqda oo la taaban karo ku leh dadaallada lagu dhisayo awoodda ciidamada qalabka sida ee Soomaaliya, iyadoo ciidamo Soomaali ah oo tababar casri ah ku soo qaatay dalkaas ay haatan door weyn ka ciyaarayaan xaqiijinta iyo adkeynta amniga caasimadda Muqdisho.

Kobaca iyo soo-kabashada dhanka amniga ayaa si weyn gacan uga geystay dardargelinta dhaqdhaqaaqyada ganacsi iyo soo-jiidashada maalgashiga ee caasimadda, iyadoo qaadista jid-gooyooyinkii iyo xannibaadihii amni ee waddooyinka muhiimka ah ay si weyn u fududeysay isu-socodka dadweynaha iyo isku-gudbinta badeecadaha.

Dhankiisa, Safiir Aktaş ayaa mahadcelin ballaaran u jeediyay Maamulka Gobolka Banaadir iyo guud ahaan shacabka Muqdisho, isagoo ku ammaanay soo dhaweyntii diirranayd, martigelintii wacneyd iyo wada-shaqeyntii hufneyd ee ay u muujiyeen muddadii uu xilka hayay.

Ugu dambayn, Danjiraha ayaa adkeeyay muhiimadda ay leedahay in la sii joogteeyo xiriirka soo jireenka ah ee Soomaaliya iyo Turkiga, kaas oo ku dhisan is-xushmeyn iyo xiriir qotodheer oo ka dhexeeya labada shacab ee walaalaha ah.