Midowga Afrika oo ku baaqay in si degdeg ah loo laalo aqoonsiga ay Israa’iil siisay Somaliland

Golaha Arrimaha Siyaasadda, Nabadda iyo Amniga ee Midowga Afrika ayaa Talaadadii ku baaqay in “si degdeg ah loo laalo” aqoonsiga ay Israa’iil siisay Somaliland.

Wasiirka Arrimaha Dibadda Israa’iil Gideon Saar ayaa Talaadadii booqday Somaliland, safar ay Soomaaliya cambaareysay, 10 maalmood kaddib markii Israa’iil si rasmi ah u aqoonsatay gobolka iskiis isu magacaabay inuu yahay dowlad madax-bannaan.

“Goluhu (AU) wuxuu si adag, erayo aad u culusna u cambaareynayaa aqoonsiga hal-dhinac ah ee ay Israa’iil siisay waxa loogu yeero ‘Jamhuuriyadda Somaliland,’” ayuu goluhu ku yiri qoraal uu ku daabacay barta X kaddib kulan heer wasiir ah.