Danjiraha Soomaaliya ee Australia oo Warqadaha Aqoonsiga u gudbiyay hoggaamiyaha dalkaas
Danjire Dr. Faysal ayaa muujiyay sida uu uga go’an yahay inuu si dhow ula shaqeeyo Dowladda Australia iyo dhammaan la-hawlgalayaasha si loo sii xoojiyo xiriirka laba geesoodka ah loona ballaariyo iskaashi dan wadaag ah.
Danjiraha Jamhuuriyadda Federaalka Soomaaliya u fadhiya Australia, Danjire Dr. Faysal Axmed Salaad, ayaa si rasmi ah Warqadaha Aqoonsiga ugu gudbiyay Sam Mostyn, hoggaamiyaha guud ee Australia.
Munaasabaddan ayaa noqotay astaan taariikhi ah oo lagu xoojinayo xiriirka diblomaasiyadeed ee u dhexeeya Soomaaliya iyo Australia. Intii ay munaasabaddan socotay, Danjire Dr. Faysal ayaa carrabka ku adkeeyay muhiimada qoto-dheereynta xiriirka laba geesoodka ah iyo ballaarinta iskaashiga ee dhinacyada muhiimka ah.
Arrimaha muhiimka ah ee laga wada hadlay ayaa waxaa ka mid ahaa doorka muhiimka ah ee adeegyada xawaaladaha ee dhaqaalaha Soomaaliya iyo baahida loo qabo fududeynta rukhsadaha iyo helitaanka adeegyada bangiyada ee Shirkadaha Adeegyada Lacageed (MSBs) ee ka shaqeeya Australia. Wadahadalladu waxay sidoo kale ka hadleen xoojinta iskaashiga dhinacyada waxbarashada iyo ganacsiga si loo dhiirrigeliyo koboc iyo horumar waara.
Danjire Dr. Faysal ayaa muujiyay sida uu uga go’an yahay inuu si dhow ula shaqeeyo Dowladda Australia iyo dhammaan la-hawlgalayaasha si loo sii xoojiyo xiriirka laba geesoodka ah loona ballaariyo iskaashi dan wadaag ah.