Wasaaradda Arrimaha Dibadda iyo Iskaashiga Caalamiga ah ee Jamhuuriyadda Federaalka Soomaaliya ayaa tacsi tiiraanyo leh u dirtay Dowladda iyo shacabka Boqortooyada Sacuudiga kadib shilkii naxdinta lahaa ee diyaaradda qumaatiga u kaca ee shirkadda Saudi Aramco, kaas oo ka dhacay Gobolka Ras Tanura, kuna geeriyoodeen 14 muwaadin oo u dhashay Sacuudiga.
Wasaaraddu waxay muujisay garab istaagga buuxa ee Jamhuuriyadda Federaalka Soomaaliya ay la garab taagan tahay Boqortooyada Sacuudiga xilligan murugada leh, waxayna Alle uga baryaysaa in uu naxariistiisa iyo dembi-dhaafkiisa siiyo dhammaan dadkii ku geeriyooday shilka, isla markaana samir, adkaysi iyo qalbi qabow ka siiyo ehelladooda iyo qoysaskooda.
Jamhuuriyadda Federaalka Soomaaliya waxay mar kale xaqiijinaysaa inay si buuxda u garab taagan tahay Boqortooyada Sacuudiga xilligan adag, iyadoo adkaynaysa xiriirka walaaltinimo iyo saaxiibtinimo ee soo jireenka ah ee mideeya labada dal iyo labada shacab.
