Wasaaradda Gaashaandhigga Soomaaliya ayaa Isniintii sheegtay in ciidamada qalabka sida ay duqeymo ku beegsadeen dagaalyahanno Al-Shabaab ah meel u dhow magaalada Baydhabo, halkaas oo lagu dilay 12 maleeshiyo ah kuwo kalena lagu dhaawacay.

Duqeymaha ayaa aroortii hore ee Isniinta lag fuliyay deegaanka Gasarta oo ku yaalla duleedka Baydhabo, iyadoo lala kaashaday saaxiibada amniga ee caalamiga ah, ayaa lagu yiri bayaan ka soo baxay wasaaradda gaashaandhigga.

Baydhabo, oo ah caasimadda maamulka Koonfur Galbeed, ayaa qiyaastii 245 kiiloomitir (152 mayl) koonfur-galbeed ka xigtaa Muqdisho.

“Hawlgaladani waa qayb ka mid ah dadaallada socda ee lagu wiiqayo awoodda howlgal ee kooxda argagixisada ah isla markaana lagu xoojinayo amniga guud ee dalka,” ayay wasaaraddu sheegtay.

Waxay intaas ku dartay in Soomaaliya, iyadoo kaashanaysa saaxiibada caalamiga ah, ay weli ka go’an tahay sii wadidda hawlgalladan si loo tirtiro halista argagixisada loona xaqiijiyo nabad iyo xasillooni waarta.

Al-Shabaab ayaa muddo ka badan 16 sano waday kacdoon ka dhan ah dowladda Soomaaliya, iyadoo inta badan beegsata ciidamada ammaanka, saraakiisha iyo rayidka.

Tan iyo bishii Luulyo, ciidamada Soomaaliya oo ay taageerayaan Hawlgalka Taageerada iyo Xasilinta Midowga Afrika ee Soomaaliya iyo saaxiibo kale ayaa kordhiyay hawlgallada ka dhanka ah kooxda iyagoo garab taagan dowladda federaalka.

Mandate-ka howlgalka ayaa loo cusbooneysiiyay hal sano oo kale Golaha Ammaanka ee Qaramada Midoobay bishii Diseembar, iyadoo qaraar ay taageertay Boqortooyada Midowday lagu kordhiyay oggolaanshaha ilaa 31-ka Diseembar.