Turkiga ayaa u yeeray Danjiraha Iiraan una gudbiyey walaaciisa ku saabsan gantaal nooca riddada dheer ah oo Arbacadii laga soo riday Iiraan kuna wajahnaa hawada Turkiga.
Sida ay sheegeen ilo diblomaasiyadeed, Danjire Maxamed Xassan Xabibollahzadeh ayaa loo gubdiyey walaaca Turkiga iyo diidmadiisa adag ee ku saabsan dhacdada.
Wasiirka Arrimaha Dibadda Turkiga Hakan Fidan ayaa sidoo kale walaaca Ankara u gudbiyay dhiggiisa Iiraan Abbas Araghchi oo ku saabsan dhacdadan.
Dhanka kale, Wasiir Fidan oo khadka telefonka kula hadlay dhiggiisa Iiraan Araghchi, ayaa u sheegay in la iska ilaaliyo tallaabo kasta oo keeni karta sii kordhinta dagaalka, sida ay sheegeen ilo ka tirsan Wasaaradda Arrimaha Dibadda Turkiga.
NATO oo qabatay gantaalka
Gantaalka riddada dheer ee Arbacadii laga soo riday Iiraan kuna wajahnaa hawada Turkiga ayaa waxaa qabtay oo baabi’iyay cutubyada difaaca hawada iyo gantaallada ee NATO ee ku sugan Bariga Mediterranean-ka, sida ay horay u sheegtay Wasaaradda Gaashaandhigga ee Turkiga.
Wasaaraddu waxay ku sheegtay barta baraha bulshada ee Turkiga ee NSosyal in gantaalka, oo la ogaaday kadib markii uu ka soo gudbay Ciraaq iyo Suuriya, ay si guul leh uga hortageen difaacyada hawadu.
Dhacdadan ayaa timid kadib weerarro wadajir ah oo Mareykanka iyo Israa’iil ay ku qaadeen Iiraan kuwaas oo lagu dilay Hoggaamiyaha Sare Cali Khamenei, saraakiil kale oo sare iyo ku dhowaad 1,050 qof oo Iiraaniyiin ah — oo ay ku jiraan 165 carruur dugsi dhiganayey ah — taasoo ku qasabtay Tehran inay bilowdo weerarro aargoosi ah oo ka socda guud ahaan gobolka.
