Wasiirka Wasaaradda Qoyska iyo Horumarinta Xuquuqul Insaanka ee Xukuumadda Federaalka Soomaaliya, Danjire Khadiija Maxamed Al-Makhzoumi, ayaa maalintii Talaadada si rasmi ah xarunta Midowga Afrika ee magaalada Addis Ababa uga gudbisay nuqulka Axdiga Afrika ee Xuquuqda iyo Daryeelka Carruurta.

Munaasabad diblomaasiyadeed oo ka dhacday xarunta dhexe ee ururka ee Addis Ababa, ayaa nuqulka axdigan oo ay Soomaaliya horay u meelmarisay, waxaa si rasmi ah loogu wareejiyey Moussa Maxamed Cumar, oo ah Ku-xigeenka Madaxa Xafiiska Guddoonka Midowga Afrika.

Waxaa sidoo kale madasha goobjoog ka ahayd Prof. Hajer Gueldich, oo ah Agaasimaha Waaxda Arrimaha Sharciga ee Midowga Afrika.

Wasiir Khadiija Maxamed Al-Makhzoumi oo hadal ka jeedisay munaasabadda wareejinta ayaa tilmaamtay in tallaabadani ay ka turjumayso sida ay dowladda Soomaaliya uga go’an tahay dhaqangelinta buuxda ee axdigan.

“Tani waa tallaabo muhiim ah oo loo qaaday dhinaca xoojinta, ilaalinta, iyo kor u qaadista xuquuqda carruurta, waxayna muujinaysaa sida dalkeenna ay uga go’an tahay daryeelka jiilka soo socda,” ayay tiri Wasiir Khadiija.

Soomaaliya ayaa horay u ansixisay Axdiga Afrika ee Xuquuqda iyo Daryeelka Carruurta, iyadoo gudbinta nuqulkan rasmiga ah (Instrument of Ratification) ay caddayn buuxda iyo marqaati u tahay u-heellanaanta Soomaaliya ee ku aaddan horumarinta iyo dhowrista xuquuqda asaasiga ah ee carruurteeda, iyadoo la waafajinayo xeerarka u degsan qaaradda Afrika.