Ra’iisul Wasaare Ku-xigeenka Jamhuuriyadda Federaalka Soomaaliya, Saalax Axmed Jaamac, ayaa Isniintii xafiiskiisa Muqdisho ku qaabilay Safiirka Jamhuuriyadda Indonesia u fadhiya Soomaaliya, T.B.H. Witjaksono Adji.
Kulanka ayaa diiradda lagu saaray xoojinta xiriirka laba geesoodka ah iyo ballaarinta iskaashiga u dhexeeya labada dal, gaar ahaan dhinacyada waxbarashada, kalluumaysiga, dhaqaalaha buluugga ah, iyo qaybaha kale ee ay labada dal danaha ka wadaagaan.
Ra’iisul Wasaare Ku-xigeenka, Saalax Axmed Jaamac, ayaa uga mahadceliyey Dowladda Indonesia iskaashiga joogtada ah iyo xiriirka sii kobcaya ee u dhexeeya labada dal. Waxa uu dib u xaqiijiyey sida ay Dowladda Federaalka Soomaaliya uga go’an tahay sii xoojinta iskaashiga iyo horumarinta saaxiibtinimada soo jireenka ah ee u dhexeysa Soomaaliya iyo Indonesia.
Wadahadallada ayaa muujiyey sida ay uga go’an tahay labada dowladood xoojinta iskaashiga laba geesoodka ah iyo sahminta fursado cusub oo iskaashi oo taageeraya horumar waara iyo barwaaqo ay labada dhinac wadaagaan.
