Shirka Qaran ee Amniga Gudaha ayaa ka furmay magaalada Muqdisho, iyadoo ay isugu yimaadeen masuuliyiin sare oo dowladda ka tirsan iyo dhinacyada amniga, si ay uga wada hadlaan amniga dalka, marxaladihii uu soo maray iyo qorshayaasha hadda laga filayo hay’adaha amniga.
Masuuliyiinta sare ee shirka ka qaybgalaya kana hadlay waxaa ka mid ah Ku-simaha Madaxweynaha Jamhuuriyadda Federaalka Soomaaliya ahna Guddoomiyaha Golaha Shacabka, Cabdulqaadir Maxamed Nuur; La-taliyaha Amniga Qaranka Aweys Xaaji; Wasiir Mukhtaar Roobow; Wasiirka Arrimaha Gudaha ee Federaalka Cali Xoosh; Wasiirka Amniga Gudaha ee Federaalka Cabdullaahi Sheekh Ismaaciil; iyo Wasiir Axmed Macallin Fiqi.
Ku-simaha Madaxweynaha Jamhuuriyadda Federaalka Soomaaliya ahna Guddoomiyaha Golaha Shacabka, Cabdulqaadir Maxamed Nuur, ayaa ka hadlay muhiimadda amniga dalka, marxaladihii uu soo maray iyo qorshaha hadda laga filayo hay’adaha amniga.
La-taliyaha Amniga Qaranka Aweys Xaaji ayaa yiri, “Qorshaha Amniga wuxuu xambaarsan yahay mas’uuliyad weyn oo dhinac walba leh.”
Wasiir Mukhtaar Roobow ayaa yiri, “Waxaa xaqiiqo ah in isbeddello waaweyn ay ku yimaadeen xaaladda amniga dalka, taasina waxay ku timid dadaallada ay sameeyeen hoggaanka qaranka.”
Wasiirka Arrimaha Gudaha ee Federaalka Cali Xoosh ayaa yiri, “Si guul looga gaaro amniga, waxaa muhiim ah in laga shaqeeyo isku-xirnaanta bulshada iyo dib-u-heshiisiinta.”
Wasiirka Amniga Gudaha ee Federaalka Cabdullaahi Sheekh Ismaaciil ayaa yiri, “Xaaladda amniga dalka waxay hadda maraysaa meel aad u wanaagsan, waxaana taas lagu gaaray midnimada hay’adaha amniga.”
Wasiir Axmed Macallin Fiqi ayaa yiri, “Shirka Amniga Gudaha waxaa looga gol leeyahay in la dhiso nidaam amni oo Soomaali leedahay, kaas oo sidoo kale xaqiijinaya isla xisaabtan.”
