Wasiirka Caafimaadka iyo Daryeelka Bulshada ee Xukuumadda Federaalka Soomaaliya,Dr. Cali Xaaji Aadan, ayaa Khamiistii xarigga ka jaray qaybo cusub oo si casri ah loo qalabeeyay oo lagu soo kordhiyay Isbitaalka De Martino ee magaalada Muqdisho.

Munaasabadda daah-furka ayaa lagu soo bandhigay adeegyo caafimaad oo muhiim ah, kuwaas oo isugu jira mashiinka baarista ee CT Scan oo casri ah, Bangiga Dhiigga (Blood Bank) oo dib-u-casriyeyn lagu sameeyay si uu uga qaybqaato badbaadinta nolosha bukaannada, iyo qaybta sheybaarka oo tayeynteeda kor loo qaaday si loo helo baaritaanno degdeg ah oo la isku halleyn karo.

Wasiirka Caafimaadka ayaa tilmaamay in qalabkan cusub uu sare u qaadi doono tayada adeegyada caafimaad ee uu isbitaalku bixiyo, isla markaana uu yareyn doono baahidii ay bukaannadu u qabeen in ay xarumaha kale u aadaan adeegyadan.

Mas’uuliyiinta Wasaaradda ayaa xusay in tallaabadan ay qayb ka tahay hirgelinta Qorshaha Caafimaadka Qaranka, kaas oo ujeeddadiisu tahay in la horumariyo oo la ballaariyo adeegyada daryeelka caafimaadka ee dalka, si bulshada Soomaaliyeed ay u helaan daryeel caafimaad oo hufan.