Taliyaha ciidamada Suudaan oo dhaliilay hindisaha xabbad-joojinta ee uu gudbiyay wakiilka Maraykanka
Burhan wuxuu ku tilmaamay “Hindisihii ugu xumaa ee abid la soo gudbiyo, maadaama uu meesha ka saarayo ciidanka qalabka sida, halka uu kooxda fallaagada ah ee RSF ku sii haynayo goobaha ay hadda joogaan.”
Guddoomiyaha Golaha Sare ee Suudaan, Abdel Fattah al-Burhan, ayaa Axaddii si adag u dhaliilay hindise uu soo gaarsiiyay lataliyaha madaxweynaha Maraykanka ee arrimaha Bariga Dhexe iyo Afrika, Massad Boulos.
Burhan wuxuu sheegay in dukumentiga “uu yahay kii ugu xumaa ee abid la soo bandhigo,” isagoo ku eedeeyay inuu meesha ka saarayo ciidanka qalabka sida, ku baaqayo in la burburo dhammaan hay’adaha amniga, isla markaana kooxda fallaagada ah ee RSF lagu sii daayo goobaha ay hayaan.
Hadalkan ayaa yimid intii lagu jiray kulan uu Burhan la yeeshay saraakiil ciidan oo heer kadible ah iyo kuwa ka sarreeya, sida lagu sheegay war kasoo baxay golaha.
Burhan faahfaahin kama bixin dukumentiga, balse Quad-ku (Sacuudi Carabiya, Masar, Imaaraadka, iyo Maraykanka) waxay 12-kii September soo jeediyeen xabbad-joojin bini’aadamnimo oo saddex bilood ah si gargaar degdeg ah loo gaarsiiyo dhammaan goobaha, taas oo u gogol-xaari lahayd xabbad-joojin waarta iyo hannaan kala-guur oo dhan 9 bilood.
Ma jiraan faallooyin degdeg ah oo ka soo baxay dhinacyada Quad ama Massad Boulos.
Burhan wuxuu ku eedeeyay dhexdhexaadiyeyaasha inay ka leexanayaan dhexdhexaadnimada haddii ay wadadaan ku sii wadaan, isagoo sheegay in wakiilka Maraykanka “uu u hadlayo si muujinaysa inuu doonayo inuu nagu qasbo wax gaar ah.”
Wuxuu intaas ku daray inuu ka cabsi qabo in Boulos uu noqdo “caqabad ka hor istaagta nabadda ay Suudaaniyiinta wada doonayaan,” isla markaana uu ku soo rogay hanjabaado, oo ay ku jiraan eedeymo ah in dowladda ay carqaladeysay gargaarka bini’aadamnimo iyo isticmaalkii sunta kiimikada.
Burhan wuxuu ku adkeystay in dukumentigaasi “aan la aqbali karin,” isagoo ku baaqay in la qaato khariiddada waddada ee Dowladda Suudaan soo bandhigtay bishii Febraayo. Qorshahaas wuxuu ku saabsan yahay wadahadal qaran oo loo dhan yahay, dowlad khubaro madaxbannaan ah, iyo in hubka la dhigo oo goobaha rayidka la banneeyo si loo bilaabo wada-hadal kasta oo lala yeesho fallaagada.
Sidoo kale, Burhan wuxuu diiday eedeymo Maraykanku soo jeediyay oo ku saabsan “saameyn Ikhwaan Muslimiin” oo ka jirta militariga, isagoo sheegay inay tahay dacaayad aan run ahayn. Wuxuu RSF ku eedeeyay “xasuuq iyo sifeyn qowmiyadeed,” wuxuuna tilmaamay dalal iyo kooxo siyaasadeed oo taageeraya RSF, isagoo ku sheegay in taageeradaasi “aan la aqbali karin.”
Burhan wuxuu carrabka ku adkeeyay: “Dagaal ma raadinno, nabaddana ma diidana, balse cidna inagama hanjabi karto ama shuruud inagama qasbi karto.”
Tan iyo Abriil 2023, Suudaan ayaa ku jirta dagaal dhexmaraya militariga iyo RSF, dagaal ay ku guuldareysteen inay joojiyaan dhexdhexaadiyeyaasha gobolka iyo caalamkaba, kaas oo kumannaan dilay, malaayiinna barakiciyay