Xafiiska Hanti-dhawrka Guud ee Dowladda Federaalka Soomaaliya iyo Maxkamadda Hanti-dhawrka Turkiga ayaa si wadajir ah Ankara uga bilaabay aqoon-is-weydaarsi ku saabsan kormeerka u hoggaansanaanta Sharciga.
Aqoon isweydaarsigan ayaa waxaa ka qeyb qaadanaya hawl-wadeenno ka kala socda Xafiiska Hanti-dhawrka Guud ee Jamhuuriyadda Federaalka Soomaaliya iyo xafiisyada hanti-dhawrka ee Dowlad Goboleedyada.
Isagoo ka hadlayay furitaanka, Ku-xigeenka Madaxa Kormeerka ee Maxkamadda Hanti-dhawrka Turkiga, Ahmet Tezcan, ayaa dib u xaqiijiyay go’aanka hay’addiisa ee ah inay sii wado taageerada iyo iskaashiga, gaar ahaan xoojinta xirfadaha, aqoonta iyo wada shaqeynta hay’adaha.
Ku-xigeenka Hanti-dhawraha Guud ee Soomaaliya, Cabdijamaal Ismaaciil Maxamed, ayaa muujiyay qaddarin ku aaddan martigelinta iyo iskaashigan, isagoo xusay in barnaamijyadan ay kor u qaadaan awoodda, wanaajiyaan tayada shaqada, isla markaana dhiirrigeliyaan is-weydaarsiga xirfadeed.
Tababarkan ayaa qayb ka ah dadaallo ballaaran oo lagu xoojinayo xirfadaha iyo aqoonta xirfadlayaasha hanti-dhawrka ee heer federaal iyo heer dowlad goboleed, iyadoo la adkeynayo mabaadi’da isla xisaabtanka, hufnaanta iyo maamul wanaagga.
