Ra’iisul Wasaaraha Itoobiya, Abiy Ahmed, ayaa Isniintii sheegay in dalkiisu “uusan lahayn damac ballaarsi dhuleed ah” isla markaana uusan doonayn inuu halis geliyo deriskiisa, isagoo ku tilmaamay helitaanka marin badeed iyo horumarrada la xiriira biyaha Niil inay yihiin mudnaan qaran oo lama huraan ah.
“Waxaan u xaqiijineynaa dunida oo dhan in Itoobiya aysan wadan hammi juqraafiyeed, aysan lahayn damac ballaarin dhuleed, isla markaana aysan doonayn inay khatar ku noqoto amniga deriskeeda,” ayuu yiri Abiy farriin gaar ah oo uu ku qoray Af-Carabi, kahor bisha Ramadaan.
Wuxuu ku tilmaamay dadaalka Itoobiya ee ku aaddan helitaanka marin badeed mid ah “baahi jiritaan oo lama huraan ah” oo ka dhalatay kororka tirada dadka iyo baahiyaha horumarineed, isagoo intaas ku daray in arrintani ay tahay casuumaad iskaashi oo “aan ku xadgudbeyn madax-bannaanida deriska isla markaana aan waxyeello u geysanayn danaha cid kale.”
Abiy ayaa sidoo kale ka hadlay xiisadaha gobolka ee ku saabsan biyaha Niilka, isagoo sheegay in dadaalka Itoobiya ee ku aaddan horumarinta kheyraadka biyaha “uusan ka dhignayn in la dhimo saamiga cid kale,” isla markaana uu webiga ku tilmaamay hanti wadajir ah oo ay tahay inay dhiirrigeliso iskaashi halkii ay ka abuuri lahayd khilaaf.
Itoobiya ayaa muddo dheer ku adkeysaneysay in Biyo-xireenka Weyn ee Itoobiya ee Dib-u-dhalinta (GERD) oo laga dhisay Niilka Buluugga ah, isla markaana hadda shaqeynaya oo koronto soo saaraya, uu yahay tiir muhiim u ah istaraatiijiyadda horumarineed iyo sahayda tamarta dalka oo ay ku nool yihiin in ka badan 120 milyan oo qof, halka dalalka hoos yimaada sida Masar iyo Suudaan ay muujiyeen walaac ku saabsan amniga biyaha.
Bilaha la soo dhaafay, Abiy ayaa kordhiyay baaqyada ku aaddan in Itoobiya, oo ah dalka ugu dadka badan Afrika ee aan bad lahayn, ay hesho marin badeed lagu kalsoonaan karo, isagoo hadallo ka jeediyay todobaadkii hore Shirweynaha 39-aad ee Midowga Afrika, kuna sifeeyay arrinta mid ah “baahi dhaqaale iyo demoqraafiyeed oo ay tahay in loo arko barwaaqo wadajir ah oo gobolka ah,” halkii laga arki lahaa hammi dhuleed.
