Qiyaastii 2,510 qof ayaa ka barakacay shan tuulo oo ku yaalla gobolka Waqooyiga Daarfuur ee dalka Suudaan, iyadoo ay sii xumaaneyso xaaladda amni, halka inta badan qoysaska ay saameysay xaaladdan ay u gudbeen dalka deriska la ah ee Jaad, sida ay Axaddii sheegtay Hay’adda Caalamiga ah ee Socdaalka (IOM).
Hay’adda IOM ayaa sheegtay in barakacaasi uu ka dhacay degmada Um Baru, isla markaana xaaladda amni ee deegaanka ay weli tahay mid aan degganeyn.
Barakacan ugu dambeeyay ayaa daba socda mawjado hore oo barakac ah oo ka dhacay isla degmadaas. Hay’adda IOM ayaa hore u sheegtay in 1,150 qof ay ka barakaceen afar tuulo intii u dhexeysay 29-kii ilaa 31-dii Oktoobar, kaddib markii 895 qof oo kale ay horraantii bishii Oktoobar ka barakaceen saddex tuulo.
Dhanka kale, hay’adda ayaa sheegtay in 115 qof ay Sabtidii ka barakaceen tuulada Al-Farshaya ee degmada Dilling, gobolka Koonfurta Kordofan. Inta badan qoysaska ay saameysay xaaladdan ayaa u guuray deegaanno kale oo ku yaalla isla degmadaas.
Horaantii, Hay’adda Caalamiga ah ee Socdaalka (IOM) iyo Hay’adda Qaramada Midoobay u qaabilsan Qaxootiga (UNHCR) ayaa bayaan wadajir ah uga digay in dhaqaale-yarida ba'an ay sababi karto in malaayiin qof oo ku barakacay dagaalka Suudaan ay waayaan hoyga degdegga ah iyo agabka aasaasiga ah ee qoysaska.
Hay’adaha ayaa sheegay in ku dhowaad 8.6 milyan oo qof ay weli barakacayaal ku yihiin gudaha Suudaan, halka in ka badan 4.6 milyan oo qof ay ka qaxeen dalka, iyagoo u gudbay dalalka kale.
Dagaallada ayaa tan iyo sanadkii hore ku sii xoogeysanayay gobollada Waqooyiga, Galbeedka iyo Koonfurta Kordofan. Dagaalka u dhexeeya ciidanka milatariga Suudaan iyo Ciidamada Taageerada Degdegga ah (RSF), oo billowday bishii Abriil 2023, ayaa sababay dhimashada tobannaan kun oo qof iyo barakaca malaayiin kale.
