Hoggaamiyeyaasha Masar, Qatar iyo Imaaraadka Carabta ayaa Talaadadii ku biiray hoggaamiyeyaasha dalalka G7 si ay uga wada hadlaan xasilloonida Bariga Dhexe.
Madaxweynaha Masar, Cabdifataax Al-Siisi, ayaa ku baaqay in xal dhammaystiran loo helo dhibaatooyinka gobolka iyo in la hirgeliyo qorshaha Madaxweynaha Mareykanka Donald Trump ee lagu soo afjarayo dagaalka Qaza.
Sida ay sheegtay Madaxtooyada Masar, Madaxweyne Al-Siisi ayaa ka qayb galay kulan cinwaankiisu ahaa “Wax ka Qabashada Xiisadaha iyo Sugidda Xasilloonida Bariga Dhexe”, kaas oo ka dhacay magaalada Evian ee dalka Faransiiska, oo uu ka socday shir-madaxeedka G7.
Kulanka ayaa waxaa sidoo kale ka qayb galay Madaxweynaha Imaaraadka Carabta Sheekh Maxamed bin Zayed Al Nahyan, Amiirka Qatar Sheekh Tamiim bin Xamad Al Thani, hoggaamiyeyaasha G7, Madaxweynaha Golaha Yurub Antonio Costa, iyo Madaxweynaha Guddiga Midowga Yurub Ursula von der Leyen.
Madaxweyne Al-Siisi ayaa sheegay in “aysan jirin wax kale oo lagu beddeli karo xal caddaalad oo waara oo loo helo arrinta Falastiin,” isagoo carrabka ku adkeeyay muhiimadda xal laba dowladood ah, oo ay ku jirto dhismaha dowlad madax-bannaan oo Falastiini ah oo ku saleysan xuduudihii 4-tii Juun 1967, iyadoo Bariga Qudus ay noqonayso caasimaddeeda.
Wuxuu sidoo kale ku baaqay in la dedejiyo hirgelinta qorshaha Trump ee lagu joojinayo dagaalka Qaza, isagoo ammaanay dadaallada Mareykanka ee horseeday heshiisyada lagu soo afjaray dagaalka Qaza iyo sidoo kale colaaddii dhowaan dhex martay Iran.
Dhanka kale, wakaaladda wararka ee Imaaraadka (WAM) ayaa sheegtay in Sheekh Maxamed bin Zayed uu kulan gaar ah la yeeshay Madaxweyne Trump intii uu socday shirku.
Labada hoggaamiye ayaa ka wada hadlay xoojinta iskaashiga istaraatiijiyadeed iyo xiriirka Imaaraadka iyo Mareykanka, waxayna is dhaafsadeen aragtiyo ku saabsan xaaladda Bariga Dhexe iyo qodobbada ku jira ajandaha G7 ee la xiriira iskaashiga lagu wajahayo caqabadaha wadajirka ah.
Amiirka Qatar Sheekh Tamiim ayaa isaguna qoraal uu ku baahiyay barta Twitterka ku sheegay inuu Evian kula kulmay Madaxweyne Trump, isla markaana ay ka wada hadleen xoojinta iskaashiga istaraatiijiyadeed iyo isku-duwidda arrimaha gobolka.
Sheekh Tamiim ayaa soo dhaweeyay heshiis is-afgarad ah oo ay gaareen Mareykanka iyo Iran, wuxuuna uga mahadceliyay Madaxweyne Trump, Pakistan, iyo dhammaan dhinacyadii taageeray heshiiskaas.
Amiirka ayaa muujiyay rajadiisa ah in wada-hadallada soo socda ay keenaan “dood wax dhisaysa iyo iskaashi dheeraad ah oo lagu xoojinayo amniga iyo xasilloonida gobolka iyo caalamka iyadoo loo marayo xalal nabadeed iyo diblomaasiyadeed.”
14-kii Juun, Mareykanka iyo Iran ayaa ku dhawaaqay inay ku heshiiyeen is-afgarad loogu talagalay in lagu soo afjaro khilaafkooda militari. Munaasabadda saxiixa heshiiska ayaa loo qorsheeyay inay 19-ka Juun ka dhacdo dalka Switzerland.
