Ciidanka RSF ayaa weerar ay u adeegsadeen diyaarado aan duuliye lahayn ku beegsaday xarun koronto oo ku taalla waqooyiga Suudaan, taas oo sababtay dab ka kacay xarunta isla markaana dhaawac fudud uu soo gaaray askari ilaalo ahaa, sida ay Arbacadii sheegeen mas'uuliyiintu.

Guddiga amniga ee Al-Dabbah ayaa sheegay in xarunta qaybinta korontada ee magaalada la weeraray, taas oo sababtay in hal askari oo ilaalo ahaa uu soo gaaro dhaawac fudud. Waxaa loo qaaday isbitaal si loogu daweeyo.

Guddigu wuxuu ku eedeeyey RSF inay si ula kac ah u beegsanayso kaabeyaasha rayidka iyo adeegyada muhiimka ah ee dadweynaha.

Warbaahinta maxalliga ah ayaa sheegtay in weerarka diyaaradaha aan duuliyaha lahayn uu sidoo kale beegsaday dhowr goobood oo ciidan, isla markaana sababtay in ay korontadu go’do taas oo saameyn ku yeelatay magaalada oo dhan.

Suudaan waxaa hareeyey colaad tan iyo bishii Abriil 2023, markaas oo dagaal uu ka dhex qarxay ciidanka dowladda iyo RSF, iyadoo la isku khilaafsanaa qorshe lagu doonayey in ciidamada RSF lagu daro ciidanka qaranka.

Dagaalkan ayaa sababay mid ka mid ah dhibaatooyinka bini’aadantinimo ee ugu xun dunida, isagoo ay ku dhinteen  tobannaan kun oo qof isla markaana ay ku barakeceen malaayiin kale.