Ra’iisul Wasaaraha Dowladda Federaalka Soomaaliya, Xamza Cabdi Barre, ayaa si rasmi ah u magacaabay guddi heer qaran ah oo qaabilsan qabanqaabada xuska 66-aad ee sannad-guurada Madax-bannaanida iyo Midnimada Soomaaliya. Isagoo ka duulaya Dastuurka Ku-meelgaarka ah ee Jamhuuriyadda Federaalka Soomaaliya iyo waajibaadka dowladda ee ilaalinta dhaxalka qaranka, Ra’iisul Wasaaruhu wuxuu dhisay guddigan si uu u maamulo diyaar-garowga munaasabadaha taariikhiga ah ee 26-ka Juun iyo 1-da Luulyo.
Guddigan cusub ayaa yeelan doona masuuliyadda guud ee qorsheynta, isku-duwidda, iyo hirgelinta dhammaan munaasabadaha rasmiga ah ee lagu xusayo dhammaadka gumeystihii iyo mideyntii gobollada waqooyi iyo koonfur ee Soomaaliya sannadkii 1960. Marka laga soo tago qabanqaabada munaasabadaha, guddiga waxaa sidoo kale loo igmaday isku-duwidda hay’adaha kala duwan ee dowladda, maareynta miisaaniyadda xuska, iyo hubinta in kharashaadka loo isticmaalo si hufan. Sidoo kale, xubnaha guddiga waxaa loo oggolaaday inay magacaabaan guddi farsamo oo gaar ah si uu u maareeyo howlaha fulinta iyo abaabulka, iyagoo si dhow ula shaqeynaya hay’adaha amniga si loo xaqiijiyo ammaanka goobaha lagu qabanayo munaasabadaha.
Guddiga waxaa guddoomiye u ah Wasiirka Arrimaha Gudaha, Federaalka iyo Dib-u-heshiisiinta, Cali Yuusuf Cali (Xoosh), kaas oo hoggaamin doona howlaha istaraatiijiyadeed iyo kuwa fulineed ee guddiga. Xubnaha guddiga waxaa ka mid ah wasiirro sare oo dowladda ka tirsan, kuwaas oo kala ah Wasiir Jeneraal Bashiir Maxamed Jaamac (Goobbe), Wasiir Maxamed Cabdi Xayir (Maareeye), Wasiir Khadiija Maxamed Al-Makhzuumi, Wasiir Xassan Xuseen Maxamed (Eelaay), Wasiir Axmed Macallin Fiqi, Wasiir Cabdifataax Qaasim Maxamuud, iyo Wasiir Maxamed Cabdulqaadir Cali.
Sidoo kale, Wasiirro Dowlayaal kala ah Xirsi Jaamac Gaani, Maxamed Cali Xagaa, iyo Nuura Mustaf Guudow ayaa xubno ka ah guddiga, waxaana sidoo kale ka qayb qaadanaya Guddoomiye Xassan Maxamed Xuseen (Muungaab). Agaasime Maxamed Cabdiraxmaan Maxamed (Boolbool) ayaa loo magacaabay xoghayaha guddiga.
Ra’iisul Wasaare Xamza Cabdi Barre ayaa faray xubnaha la magacaabay inay yeeshaan wada-shaqeyn joogto ah inta lagu jiro muddada qorsheynta si si habboon loo muujiyo qiimaha taariikheed ee halgankii gobannimo-doonka Soomaaliya. Xafiiska Ra’iisul Wasaaraha ayaa xusay in munaasabadaha qaran ee soo socda ay tahay inay xoojiyaan waddaniyadda, kobciyaan wadajirka bulshada, isla markaana adkeeyaan ruuxa midnimada Soomaaliyeed iyadoo dalku uu sii wado dib-u-dhiska hay’adaha dowladda iyo xasillinta bulshada iyo dhaqaalaha.
