Israa'iil oo duqeymo ay ka fulisay Lubnaan ku dishay 26 qof, kuna dhaawacday 33 kale
Duqeymo xooggan ayaa lala beegsaday magaalooyin ku yaalla degmooyinka Nabatieh, Tyre, Sidon iyo Baalbek.
Ugu yaraan 26 qof ayaa ku dhintay 33 kalena waa ay ku dhaawacmeen duqeymo taxane ah oo Israa’iil ay Axaddii ka fulisay koonfurta iyo bariga Lubnaan, sida ay sheegeen mas’uuliyiinta Lubnaan.
Xarunta Hawlgallada Degdegga ah ee Wasaaradda Caafimaadka Lubnaan ayaa bayaano kala duwan ku sheegtay in 19 qof ay ku dhinteen 16 kalena ku dhaawacmeen saddex duqeyn oo Israa’iil ka fulisay koonfurta Lubnaan.
Mid ka mid ah duqeymaha ayaa lagu beegsaday magaalada Sir al-Gharbiya ee degmada Nabatieh, halkaas oo ay ku dhinteen 10 qof halka 6 kalena ay ku dhaawacmeen.
Duqeyn kale ayaa ku dhacday xaafadda Al-Athar ee magaalada Tyre, taasoo lagu dilay siddeed qof, halka duqeyn saddexaad oo lala beegsatay xerada qaxootiga Falastiiniyiinta ee Ain al-Hilweh ee magaalada Sidon, uu ku naf waayey hal qof oo Falastiini ah isla markaana ay ku dhaawacmeen 10 kale, oo ay ku jiraan saddex muwaadiniin Lubnaaniyiin ah.
Dhanka kale, lix xubnood oo ka tirsan hal qoys ayaa ku dhintay duqeyn Israa’iil ay ku beegsatay guri iyo goob lagu dayactiro baabuurta oo ku taalla magaalada Douair ee degmada Nabatieh, sida ay sheegtay Wakaaladda Wararka Qaranka Lubnaan (NNA).
Kooxaha difaaca rayidka iyo shaqaalaha ambalaasyada ee Ururka Risala Scout Association, Hay’adda Caafimaadka Islaamiga ah iyo Bisha Cas ee Lubnaan ayaa ka qayb qaatay soo saarista meydadka iyo u qaadista isbitaallada gobolka, sida ay sheegtay wakaaladdu.
NNA ayaa sidoo kale sheegtay in duqeymaha Israa’iil lagu beegsaday qiyaastii 15 shaqaale ah, badankoodna ahaa muwaadiniin Suuriyaan ah, kuwaas oo ka dejinayay gaari xamuul ah oo sida digaag beer ku taalla magaalada Yahmar al-Shaqif ee koonfurta Lubnaan.
Shaqaalaha ambalaasyada ayaan awoodin inay gaaraan goobta sababo la xiriira xaaladda amni ee khatarta ah, ayay wakaaladdu sheegtay, iyadoo aan sheegin tirada khasaaraha.
Isla degmadaas, hal qof ayaa dhaawac fududi soo gaaray kadib markii madfac uu ku dhacday guri ku yaalla magaalada Sarba, sida ay sheegtay NNA.
Bariga Lubnaan, duqeymaha Israa’iil ayaa lagu beegsaday gaari cagaf ah oo yaallay tuulada Brital ee degmada Baalbek, taasoo dishay hal qof isla markaana dhaawacday muwaadin Suuriyaan ah.
Israa’iil ayaa ballaarisay ololaheeda militari ee Lubnaan tan iyo Isniintii la soo dhaafay kadib markii kooxda Xisbullah ay ridday tiro kooban oo gantaallo ah, iyadoo xiisado ballaaran oo gobolka ka jira ay la xiriiraan dagaalka Maraykanka iyo Israa’iil ay ku qaadeen Iiraan.
Xiisadaha gobolka ayaa sii kordhay tan iyo 28-ka Febraayo, markaas oo Maraykanka iyo Israa’iil ay weerar wadajir ah ku qaadeen Iiraan, kaasoo dilay in ka badan 1,200 qof, oo ay ku jiraan hoggaamiyaha ugu sarreeya Ayatollah Cali Khamenei.
Iiraan ayaa ka jawaabtay iyadoo fulisay weerarro diyaarado aan duuliye lahayn iyo gantaallo ah oo beegsanaya Israa’iil iyo dalalka Khaliijka ee martigeliya saldhigyada militariga Maraykanka.
Kordhinta xiisadda ayaa gaartay Lubnaan, iyadoo Israa’iil iyo Hezbollah ay is weydaarsadeen weerarro xuduudda ka gudba, kuwaas oo dilay ku dhowaad 400 qof, dhaawacay in ka badan 1,100 qof, isla markaana barakiciyay kumannaan qof tan iyo Isniintii, sida ay muujinayaan tirooyinka Lubnaan.