Wasiirka Arrimaha Dibadda Iiraan Abbas Araghchi ayaa diiday sheegashada Maraykanka ee ah in Iiraan ay qorsheynaysay inay weerarto Maraykanka ama ciidamada Maraykanka, isagoo ku tilmaamay eeddaas “been cad oo aan waxba ka jirin.”
“Sheegashada ah in Iiraan ay qorsheynaysay inay weerarto Maraykanka ama ciidamada Maraykanka, ha noqoto weerar ka hortag ah ama mid horudhac ah, waa been cad oo aan waxba ka jirin,” ayuu ku qoray barta X.
Wuxuu intaas ku daray in sheegashadan loogu talagalay in lagu cudurdaarto “Howlgalka Epic Mistake,” kaas oo uu sheegay inuu yahay “tallaabo khaldan oo ay qorsheysay Israa’iil isla markaana ay bixiyeen kharashkeeda dadka caadiga ah ee Maraykanka.”
Xiisadaha gobolka ayaa sii kacsanaa markii Israa’iil iyo Maraykanka ay weerar wadajir ah ku qaadeen Iiraan.
Tehran ayaa ka jawaabtay iyadoo ridday gantaallo iyo diyaarado aan duuliye lahayn oo beegsanaya Israa’iil, Urdun, Ciraaq iyo dalalka Khaliijka ee martigeliya saldhigyada militariga Maraykanka.
Ku dhowaad 10,000 goobood oo rayid ah oo la beegsaday
Safirka Iiraan ee Qaramada Midoobay ayaa sheegay in weerarrada wadajirka ah ee Maraykanka iyo Israa’iil ay dileen in ka badan 1,300 qof oo rayid ah tan iyo markii uu bilaabmay dagaalka.
Sida uu sheegay ergayga Iiraan, duqeymaha ayaa si ula kac ah u beegsaday kaabayaasha rayidka ee dalka oo dhan.
Wuxuu sheegay in weerarradu ay ilaa hadda burburiyeen 9,669 goobood oo rayid ah.
Ergaygu wuxuu intaas ku daray in duqeymaha ay sidoo kale ku dhaceen 32 xarumood oo caafimaad, 65 iskuul, 13 dhisme oo ay leedahay Bisha Cas ee Iiraan iyo dhowr xarumood oo tamar.
Keydadka shidaalka ee Tehran iyo magaalooyin kale ayaa sidoo kale la beegsaday, taasoo sababtay sii deynta wasakh sun ah oo khatar caafimaad oo weyn ku ah dadka rayidka ah, gaar ahaan carruurta, ayuu yiri.
Iiraan ayaa sidoo kale ka digtay in wasakhowga ka dhashay qaraxyadu uu abuuray walaac caafimaad oo weyn oo soo wajahay dadka.
Ergaygu wuxuu sheegay in weerarradu ay jebinayaan Axdiga Qaramada Midoobay iyo Heshiiska Vienna ee 1961 ee Xiriirka Diblomaasiyadeed.
