Danjiraha cusub ee Jamhuuriyadda Federaalka Soomaaliya u fadhiya dalka Nigeria, Maxamed Cismaan Maxamed, ayaa si rasmi ah waraaqaha aqoonsiga danjirenimo ugu gudbiyay Madaxweynaha Jamhuuriyadda Federaalka Nigeria Bola Ahmed Tinubu, munaasabad diblomaasiyadeed oo ka dhacday madaxtooyada dalkaas.
Madaxweyne Tinubu oo si diirran u soo dhaweeyay safiirka cusub, ayaa muujiyay sida ay dowladdiisa uga go’an tahay xoojinta iyo horumarinta xiriirka saaxiibtinimo iyo iskaashiga istaraatiijiyadeed ee kala dhexeeya Jamhuuriyadda Federaalka Soomaaliya.
Wuxuu si gaar ah carrabka ugu adkeeyay muhiimadda ay leedahay in labada waddan ay wada-shaqayn dhow ka yeeshaan dhinacyada mudnaanta gaarka ah leh, kuwaas oo ay ka mid yihiin ganacsiga, amniga, horumarka waara, iyo is-dhaafsiga dhaqamada.
Dhankiisa, Danjire Maxamed Cismaan ayaa uga mahadceliyay Madaxweynaha dalka Nigeria soo-dhaweynta maamuuska sare leh ee loo sameeyay. Wuxuu u caddeeyay madaxweynaha in xilliga uu xafiiska joogo uu dadaal xooggan ku bixin doono adkaynta xiriirka iyo iskaashiga u dhexeeya labada dal, isla markaana uu ka shaqayn doono sidii loo abuuri lahaa iskaashi miro-dhal ah oo u adeegaya danaha labada shacab.
Qoraal rasmi ah oo ka soo baxay Safaaradda Soomaaliya ee magaalada Abuja ayaa lagu xusay in munaasabaddani ay mar kale adkaynayso sida ay Dowladda Federaalka Soomaaliya uga go’an tahay horumarinta xiriirrada diblomaasiyadeed iyo kuwa caalamiga ah, kuwaas oo saldhig looga dhigay ixtiraam is-dhaafsi ah, iskaashi wax-ku-ool ah, iyo in laga wada shaqeeyo yoolalka la wadaago.
