Wasiirka Cadaaladda iyo Arrimaha Dastuurka ee Dowladda Federaalka Soomaaliya, Mudane Xasan Macallin Maxamuud, ayaa Arbacadii kulan diblomaasiyadeed oo heer sare ah la yeeshay Ra’iisul Wasaaraha Jamhuuriyadda Dimuqraadiga Shacabka ee Aljeeriya, Mudane Sifi Ghrieb.
Wadahadallada oo ka dhacay magaalada Algiers ayaa diiradda lagu saaray xoojinta xiriirka taariikhiga ah ee qotada dheer ee u dhexeeya labada dal iyo ballaarinta iskaashiga laba geesoodka ah.
Qodobka ugu muhiimsan ee kulanka ayaa ahaa xoojinta iskaashiga hay’adaha ee dhinacyada cadaaladda iyo sharciga. Labada hoggaamiye ayaa ka wada hadlay hababka lagu is-weydaarsan karo khibradaha garsoorka iyo horumarinta qaab-dhismeedyo sharci oo wadajir ah si loo wanaajiyo maamulka caddaaladda.
Kulanka ayaa sidoo kale ahaa fursad lagu adkeeyay sida ay uga go’an tahay labada dowladood iskaashi ku dhisan xiriir walaaltinimo, is-ixtiraam iyo dano istiraatiiji ah oo wadaag ah.
Wafdiga Soomaaliya waxaa ka mid ahaa Safiirka Jamhuuriyadda Federaalka Soomaaliya u fadhiya Aljeeriya, Mudane Yuusuf Axmed Xasan.
Wasiir Xasan Macallin Maxamuud ayaa uga mahadceliyay hoggaanka iyo shacabka Aljeeriya soo dhoweynta iyo martigelinta diirran, isagoo xusay in kulankani uu yahay tallaabo muhiim ah oo lagu sii adkeynayo saldhigga istiraatiijiyadeed ee xiriirka diblomaasiyadeed ee u dhexeeya Muqdisho iyo Algiers.
