Kuliyadda Caafimaadka ee Mogadishu Recep Tayyip Erdoğan, oo hoos timaada Jaamacadda Cilmiga Caafimaadka (UHS), ayaa si sharaf leh u qalinjebisay 172 arday, xaflad ka dhacday caasimadda Soomaaliya ee Muqdisho

Iyada oo qayb ka ah himilada UHS ee ah in ay soo saarto xirfadlayaal daryeel caafimaad oo tayo leh, munaasabadda Isniintii waxaa ka buuxay farxad, sharaf, iyo xasuuso qiiro leh, iyada oo la xoojinayay falsafadda machadka ee ah "bani'aadamnimada marka hore."

Xafladda qalin-jabinta, oo uu marti-geliyay Dekaan Prof. Dr. Raşit Gündoğdu, ayaa waxaa isugu yimid mas’uuliyiin ka socday dowladda Soomaaliya, Safiirka Turkiga ee Soomaaliya, Alper Aktaş, wakiilo ka socday hay’adaha Turkiga ee ka howl-gala Soomaaliya, iyo qoysaska qalin-jebiyayaasha.

Guddoomiyaha Jaamacadda UHS Prof. Dr. Kemalettin Aydin oo qaab online aha kaga qayb-galay, ayaa khudbad xooggan oo uu jeediyey, carrabka ku adkeeyey in munaasabadda aysan kaliya ahayn qalinjebin, balse ay tahay xaqiijinta himilo ilbaxnimo.

"Xafladda maanta ma ahan oo kaliya in bixinta shahaadooyinka. Waxay astaan u tahay buundada ilbaxnimo oo kudhisan walaaltinimo iyo qalbiyo u heellan.

Gobollada ay iska indhatirtay nidaamka caalamiga ah ee ay daashadeen qaab-dhismeedyada boobka ah, waxaan ku faaneynaa inaan soo saarno xirfadlayaal daryeel caafimaad oo leh aqoon, naxariis, iyo jacayl bani'aadamnimo," ayuu raaciyay Aydın.

'Iftiin Rajjo'

"Annaga oo ah UHS, waxaan ka badan waxbarid ayaan qabanaa –waxaan sameynaa xiriir qalbi iyo fulinta masuuliyad taariikhi ah. Shaqaale kasta oo daryeel caafimaad oo lagu tababaro Soomaaliya wuxuu sidoo kale noqon doonaa codka dadka dulman iyo wakiilka bani’aadamnimada," ayuu yiri.

"Munaasabadan qiimaha badan, waxaan xusayaa Suldaan Cabdulxamiid II, oo dhidibada u taagay aasaaska aqooneed ee jaamacadeena qarniyo ka hor, markii uu aasaasay Mekteb-i Tıbbiye-i Şahane, isagoo isku daray aqoonta iyo naxariista himilo aragti fog leh," ayuu yiri guddoomiyaha.

"Waxaan sidoo kale u mahad celinayaa Madaxweyne Recep Tayyip Erdoğan, oo soo nooleeyay himiladan casriga ah isagoo aasaasay jaamacadeena 2015-kii una horseeday waxbarashada caafimaadka caalamiga ah."

Wuxuu sheegay in jaamacadda ay sii wadi doonto inay noqoto “iftiin rajjo oo aan kaliya ka jirin Turkiga balse gees kasta oo ka mid ah juqraafi dhaqameedkeena wadaagga ah,” isla markaana ay tahay “adeeg Ilaah iyo bani’aadamnimada.” 

Safiirka Turkiga ee Soomaaliya Alper Aktaş ayaa iftiimiyay in xiriirka u dhexeeya Turkiga iyo Soomaaliya uu ka gudbay saaxiibtinimo una gudbay iskaashi istiraatiiji ah.

Wuxuu xusay in Kuliyadda Caafimaadka ee Recep Tayyip Erdoğan ee Mogadishu ay noqotay hay'ad tusaale u ah waxbarashada caafimaadka oo aan Soomaaliya kaliya ku koobaneyn balse guud ahaan qaaradda Afrika.

“Waxaan si adag u shaqeynay si aan u guuleysano,” ayuu cadeeyey. 

Wuxuu dib u xaqiijiyay ballanqaadka Turkiga ee ah inuu sii wadi doono taageerada Soomaaliya dhinacyada caafimaadka, waxbarashada, iyo gargaarka bini’aadminimo.

Wasiirka Waxbarashada Soomaaliya, Nura Mustaf Mukhtar, ayaa ka hadashay iskaashiga qoto dheer ee u dhexeeya labada dal, iyada oo dib ugu celisay gargaarkii bini'aadannimo ee Turkiga u fidiyay Soomaaliya 2011-kii.

"Maanta, waxaan markhaati ka nahay sida abuurkaasi uu u noqday geed xooggan," ayay tiri. Wasiir Nura ayaa muujisay sharaf ay u haysay qalinjabiyeyaasha gaar ahaan kuwa ka soo qalinjabiyay Waaxda Gargaarka Degdegga ah iyo Maareynta Masiibooyinka, waxayna u hambalyaysay dhammaantood, iyada oo si gaar ah u xustay kuwa ka soo qalinjabiyay barnaamijyada kalkaalinta iyo umulisooyinka.

Fowsiya Cabdikadir, oo ku hadlaysay magaca qalinjabiyeyaasha, ayaa sheegtay in waxbarashadooda UHS aysan kaliya ku koobneyn aqoon tacliimeed balse ay sidoo kale barteen mas’uuliyad qoto dheer.

"Waxaan u shaqeynay si adag si aan u gaarno heerkan. Waxaan uga mahadcelinayaa jaamacaddayada iyo qof walba oo naga taageeray safarkan,” ayay tiri.

Xafladda ayaa lagu soo gabagabeeyay bixinta shahaadooyinka, dabbaaldegga tuurista koofiyadaha, iyo sawirro kooxeed.