Ra’iisul Wasaaraha Soomaaliya Xamsa Cabdi Barre ayaa dowladda iyo shacabka Turkiga ugu hambalyeeyay sanad-guuradii 104-aad ee Maalinta Guusha, oo la xuso 30-ka Agoosto.
Xamsa ayaa sheegay in maalintani ay astaan u tahay guushii taariikhiga ahayd ee Dumlupınar ee 1922, taas oo door weyn ka qaadatay Dagaalkii Xorriyadda Turkiga, isla markaana gogol xaar u noqotay aasaaskii Jamhuuriyadda Türkiye.
Ra’iisul Wasaaruhu waxa uu xusay geesinimadii iyo naf-hurnimadii dadkii u halgamay madax-bannaanida Turkiga, isagoo sheegay in dhaxalka 30-ka Agoosto uu weli ka muuqdo adkeysiga, midnimada iyo ilaalinta madax-bannaanida dalkaas.
Dhanka xiriirka labada dal, Xamsa ayaa Turkiga ku tilmaamay saaxiib iyo walaal istiraatiiji ah oo Soomaaliya kala shaqeeya dhinacyada diblomaasiyadda, horumarinta, amniga, waxbarashada, ganacsiga iyo gargaarka bani’aadannimo.
Waxa uu sidoo kale xaqiijiyay sida ay Soomaaliya uga go’an tahay sii xoojinta xiriirka iyo iskaashiga Turkiga, si looga wada shaqeeyo nabadda, xasilloonida iyo horumarka labada shacab.
