Madaxweynaha Maraykanka, Donald Trump, ayaa hadal rajo leh ka bixiyay suurtagalnimada in xukuumadda Ankara laga qaado cunaqabateynta uu Maraykanku ku soo rogay ee hoos timaada sharciga CAATSA, inkastoo uusan shaacin wax go’aan rasmi ah oo arrintaas laga gaaray.
Mar la weydiiyay waxa hortaagan in cunaqabateynta laga qaado Turkiga, ayuu Trump tilmaamay xiriirka dhow ee uu la leeyahay dhiggiisa Recep Tayyip Erdogan. “Mar walba waan la hadli doonaa Madaxweyne Erdogan. Waa saaxiibkey sida aad ogtihiin, mar walbana waan ka farxin doonaa,” ayuu yiri.
Bishii Luulyo, xilli uu Erdogan kula kulmay shir-madaxeedkii gaashaanbuurta NATO, Trump ayaa shaaciyay inuu doonayo in Ankara laga qaado xayiraadda CAATSA, isagoo xusay inuu "hubaal" tixgelin doono in Turkiga dib loogu oggolaado iibsashada diyaaradaha dagaalka ee F-35.
Sidoo kale, horraantii sannadkan ayuu Trump si cad u sheegay yoolkiisa arrintan ku aaddan. “Cunaqabateynta waan ka qaadi doonnaa. Waxaa la gaaray waqtigii sidaas la samayn lahaa... Ma doonayno inaan cunaqabateynno saaxiibbadeenna. Arrintu sidaas ayay u fudud tahay,” ayuu raaciyay.
Khilaafka F-35 iyo S-400
Xukuumadda Washington ayaa Turkiga ka saartay barnaamijka iibsashada iyo samaynta diyaaradaha F-35 sannadkii 2019-kii, kaddib markii ay Ankara ka iibsatay Ruushka nidaamka difaaca cirka ee S-400.
Maraykanka ayaa ku dooday in nidaamkaas uu khatar amni ku yahay diyaaradaha F-35, isla markaana uusan la jaanqaadi karin nidaamyada difaaca ee isbahaysiga NATO.
Daba-yaaqadii sannadkii 2020-ka, Washington ayaa Turkiga ku soo rogtay cunaqabateyn hoos timaada sharciga CAATSA, taas oo si gaar ah loogu beegsaday Hay’adda Warshadaha Difaaca ee dalkaas iyo dhowr mas’uul oo sarsare, sababo la xiriira heshiiska S-400.
Dhankiisa, Turkiga ayaa marar badan ku dooday inuu nidaamka Ruushka u iibsaday si uu u daboolo baahidii degdegga ahayd ee dhanka difaaca cirka, kaddib markii uu waayay fursad uu Maraykanka uga helo gantaallada difaaca ee Patriot.
Sidoo kale, xukuumadda Ankara ayaa gaashaanka u daruurtay walaaca Washington ee ku aaddan isku-adeegsiga nidaamyada S-400 iyo F-35.
Khilaafkan ayaa muddo dheer ka mid ahaa caqabadaha ugu waaweyn ee hortaagan xiriirka difaaca ee u dhexeeya labada waddan, iyadoo Turkigu uu si xooggan u raadinayo in cunaqabateynta laga qaado, dibna loogu soo celiyo barnaamijka F-35.
