Ra’iisul Wasaare Xamza Cabdi Barre ayaa Arbacadii ka qaybgalay daah-furka Warbixinta Dhaqaalaha Soomaaliya ee 2025, oo ay diyaarisay Wasaaradda Maaliyadda, taas oo lagu soo bandhigay horumarka laga sameeyay kobaca dhaqaalaha iyo dib-u-habeynta nidaamka maaliyadeed ee dalka.
Munaasabadda waxaa ka qaybgalay xildhibaanno ka tirsan Baarlamaanka Federaalka, wasiirro, safiirro, khubaro dhaqaale iyo mas’uuliyiin kale.
Warbixinta ayaa dib u eegis ku sameysay guud ahaan waxqabadka dhaqaalaha Soomaaliya sannadkii 2025, oo ay ku jiraan dib-u-habeynta maaliyadda, kororka dakhliga gudaha iyo isbeddellada ku yimid taageerada maaliyadeed ee dibadda.
Ra’iisul Wasaare Xamza ayaa sheegay in adkeysiga shacabka Soomaaliyeed iyo dadaallada dawladda ay gacan ka geysteen sii socoshada kobaca dhaqaalaha, inkastoo ay jireen caqabado gudaha iyo dibadda ah. Waxa uu Wasaaradda Maaliyadda ku ammaanay xoojinta maamulka maaliyadda dadweynaha, daahfurnaanta iyo isla xisaabtanka, gaar ahaan kordhinta ururinta dakhliga gudaha.
“Dawladdu ma aysan siyaasadeyn, mana siyaasadeyn doonto taageerada maaliyadeed ee ay siiso Dawlad-goboleedyada. Sannadkii 2025 wuxuu ahaa sannadkii taageerada maaliyadeed ee ugu badan la siiyay Dawlad-goboleedyada,” ayuu yiri Ra’iisul Wasaare Xamza.
Waxa uu sidoo kale adkeeyay baahida loo qabo in la sii wado dib-u-habeynta dhaqaalaha, la abuuro jawi ku habboon maalgashiga gudaha iyo dibadda, lana xoojiyo shuruucda iyo siyaasadaha hagaya dhaqaalaha iyo maalgashiga.
